Manjummel Boys: ఇళయరాజా లీగల్‌ నోటీసులు.. స్పందించిన ‘మంజుమ్మెల్‌ బాయ్స్‌’ నిర్మాత

ఇంటర్నెట్‌డెస్క్‌: ప్రముఖ సంగీత దర్శకుడు ఇళయరాజా (Ilaiyaraaja) ‘మంజుమ్మెల్‌ బాయ్స్‌’ (Manjummel Boys) చిత్ర నిర్మాతకు లీగల్ నోటీసులు పంపిన సంగతి తెలిసిందే. తన అనుమతి లేకుండా ‘గుణ’లోని పాటను సినిమాలో వాడారంటూ సదరు నోటీసుల్లో పేర్కొన్నారు. దీంతో ఇళయరాజా లీగల్‌ నోటీసుల వ్యవహారం మరోసారి చిత్ర పరిశ్రమలో వార్తల్లో నిలిచింది. ఈనేపథ్యంలో చిత్ర నిర్మాత షాన్‌ ఆంటోనీ స్పందించారు. ఓ న్యూస్‌ పోర్టల్‌కు ఇచ్చిన ఇంటర్వ్యూలో మాట్లాడుతూ.. కాపీరైట్‌ కలిగిన రెండు మ్యూజిక్‌ కంపెనీలను సంప్రదించి వారినుంచి అనుమతి తీసుకున్న తర్వాతే పాటను వాడామని స్పష్టత ఇచ్చారు.

అయితే, ఈ విషయంలో ఇళయరాజా వాదన మరోలా ఉంది. ఆ పాటకు మ్యూజిక్‌ కంపోజర్‌ కావడం వల్ల తనకే మొదటి ఓనర్‌ రైట్స్‌ ఉంటాయని అంటున్నారు. తన పనికి సంబంధించిన ప్రతీ మ్యూజిక్‌ బిట్‌పైనా హక్కులు తనకే చెందుతాయని చెబుతున్నారు. మంజుమ్మెల్‌ బాయ్స్‌ చిత్రబృందం తన నుంచి ఎలాంటి అనుమతి తీసుకోలేదని నోటీసుల్లో పేర్కొన్నారు. గతంలోనూ ఓ సినిమాలోని పాటను మరో సినిమాలో వినియోగించడంపై న్యాయపరంగా వాదోపవాదాలు నడిచాయి. మ్యూజిక్‌ కంపెనీలు ఎన్ని సంవత్సరాలైతే హక్కులు కలిగిఉంటాయో అన్నేళ్లు వాటికే చెందుతాయి తప్ప, ఆ పాటలను కంపోజ్‌ చేసిన సంగీత దర్శకుడికి ప్రత్యేకంగా హక్కులంటూ ఉండవని న్యాయస్థానం ఓ సందర్భంలో అభిప్రాయపడింది.

ఆ మేకప్‌ అంతా ఓరియో బిస్కెట్లే..

‘మంజుమ్మెల్‌ బాయ్స్‌’కు సంబంధించి మరో ఆసక్తికర విషయం బయటకు వచ్చింది. గుహలో పడిపోయి తీవ్ర గాయాలపాలైన సుభాష్‌ (శ్రీకాంత్‌ బసి)కి మేకప్‌ను ఓరియో బిస్కెట్లతో వేశారు. క్లైమాక్స్‌లో ఒంటి నిండా బురద, రక్తం కారుతున్న గాయాలతో శ్రీకాంత్‌ కనిపిస్తాడు. అయితే, మేకప్‌ ఆర్టిస్ట్‌ ఆ బురదను రీక్రియేట్‌ చేయడానికి ఓరియో బిస్కెట్లను పేస్టులా చేసి ఒంటికి రాశారు. ఈ విషయాన్ని చిత్ర దర్శకుడు చిదంబరం తాజాగా పంచుకున్నాడు. ‘సుభాష్‌ పాత్రకు రోనెక్స్‌ జేవియర్‌ మేకప్‌ వేశారు. అది చూసి ప్రతిఒక్కరూ ఆశ్చర్యపోయారు. ఒంటికి బిస్కెట్లను పేస్టులా చేసి రాశారు. ఆ వాసనకు చీమలు వచ్చి, కుట్టడం మొదలుపెట్టాయి. గాయాలపాలైన వ్యక్తి ఏ విధంగా బాధపడతాడో అలాగే శ్రీకాంత్‌ హావభావాలు పలికించారు’ అని చెప్పుకొచ్చారు.