Manjummel Boys: భావోద్వేగభరిత సర్వైవల్‌ థ్రిల్లర్‌

మలయాళంలో విజయవంతమైన ‘మంజుమ్మల్‌ బాయ్స్‌’ చిత్రాన్ని మైత్రీ మూవీ మేకర్స్‌ సంస్థ తెలుగులో అదే పేరుతో విడుదల చేస్తున్న సంగతి తెలిసిందే. సౌబిన్‌ షాహిర్‌, గణపతి, ఖలీద్‌ రెహమాన్‌, శ్రీనాథ్‌ భాసి ప్రధాన పాత్రల్లో నటించిన ఈ సినిమాని చిదంబరం ఎస్‌ పొదువల్‌ తెరకెక్కించారు. ఈ చిత్రం ఈనెల 6న తెలుగులో విడుదల కానుంది. ఈ నేపథ్యంలో ఆదివారం ఈ చిత్ర ట్రైలర్‌ని విడుదల చేశారు. కొడైకెనాల్‌లోని గుణ కేవ్స్‌లో చిక్కుకున్న తన మిత్రుడ్ని రక్షించడం కోసం ఎర్నాకులం మంజుమ్మల్‌ బాయ్స్‌ చేసిన సాహసోపేతమైన ప్రయత్నమే ఈ చిత్ర కథాంశం. ఈ ఇతివృత్తాన్ని ట్రైలర్‌లో ఉత్కంఠభరితంగా చూపించారు. ప్రధాన పాత్రల మధ్య స్నేహాన్ని చూపిస్తూ ప్రచార చిత్రం ఆసక్తికరంగా మొదలైంది. వారిలో ఒకరు గుహలోని లోతైన గుంటలో పడిపోవడం.. అతన్ని రక్షించేందుకు తోటి మిత్రులంతా ప్రయత్నాలు ప్రారంభించడం.. ఈ క్రమంలో ప్రభుత్వ బృందాలు రంగంలోకి దిగడం.. వారికి ఎదురయ్యే సవాళ్లతో ట్రైలర్‌ ఆద్యంతం ఉత్కంఠభరితంగా సాగింది. ఈ ప్రచార చిత్రాన్ని తీర్చిదిద్దిన తీరును బట్టి ఇదొక భావోద్వేగభరితమైన సర్వైవల్‌ థ్రిల్లర్‌గా ఉండనున్నట్లు అర్థమవుతోంది. ఈ చిత్రానికి సంగీతం: సుశీన్‌ శ్యామ్‌, ఛాయాగ్రహణం: షైజు ఖలీద్‌.