Naga Babu: భిన్నాభిప్రాయాలున్నా మా బంధం ప్రత్యేకం.. నాగబాబు ఎమోషనల్‌ పోస్ట్

ఇంటర్నెట్‌ డెస్క్‌: నటుడు వరుణ్‌ తేజ్‌  (Varun Tej)- లావణ్య త్రిపాఠి(Lavanya Tripathi) పెళ్లి వేడుక ఘనంగా జరిగింది. ఈ పెళ్లికి సంబంధించిన ఫొటోలు గత కొన్ని రోజులుగా సోషల్‌ మీడియాలో సందడి చేస్తున్నాయి. ఈ వివాహంలో మెగా బ్రదర్స్‌ నాగబాబు, చిరంజీవి(Chiranjeevi), పవన్‌ కల్యాణ్‌ల (Pawan Kalyan) ఫొటో వైరల్‌గా మారింది. నాగబాబు ఈ ఫొటోను షేర్‌ చేస్తూ అన్నదమ్ముల బంధం గురించి ఓ ఎమోషనల్‌ నోట్‌ రాశారు.

‘‘మా మధ్య ఎన్ని భిన్నాభిప్రాయాలున్నా.. మా అన్నదమ్ముల బంధం ఎప్పటికీ ప్రత్యేకమైనదే. ఈ ఫొటో ఓ జ్ఞాపకం మాత్రమే కాదు అంతకు మించింది. మా మధ్య ఉన్న అభిప్రాయ భేదాల కంటే లోతైన అనుబంధం చాలా ముఖ్యమైనది. ప్రేమతో కూడిన ఎన్నో మధుర క్షణాలతో ఈ రిలేషన్‌ ముడిపడి ఉంది. ఇది ఎప్పటికీ విడదీయరానిది. బలమైనది. దీనికి నేనెంతో విలువనిస్తాను’’ అంటూ తన ఇన్‌స్టా పోస్ట్‌లో రాసుకొచ్చారు. ఈ ఫొటో చూసిన మెగా ఫ్యాన్స్‌ సంబర పడుతున్నారు. ‘పిక్చర్ పర్‌ఫెక్ట్‌’ అంటూ కామెంట్స్‌ పెడుతున్నారు.

వైద్య రిపోర్టులో అంతా సరిగా ఉన్నట్లే వచ్చింది.. కానీ అలా జరిగింది: సుస్మితా సేన్‌

ఇటలీ వేదికగా నవంబర్‌ 1న వరుణ్‌-లావణ్యల వివాహం జరిగింది. కుటుంబసభ్యులతో పాటు సినీ పరిశ్రమకు చెందిన కొందరు హీరోలు దీనికి హాజరయ్యారు. ఇక సినీ ఇండస్ట్రీ, ప్రముఖుల కోసం నవంబర్‌ 5న హైదరాబాద్‌లో రిసెప్షన్‌ నిర్వహించనున్నారు. మాదాపూర్‌ ఎన్‌-కన్వెన్షన్‌ వేదికగా ఈ కార్యక్రమం జరగనుంది. ఇప్పటికే దీని కోసం ఏర్పాట్లు మొదలయ్యాయి.