Nagarjuna: ‘మనం’ విషయంలో ఆ బాధ ఎప్పటికీ ఉంటుంది: నాగార్జున

ఇంటర్నెట్‌ డెస్క్‌: అక్కినేని హీరోలంతా కలిసి నటించిన చిత్రం ‘మనం’ (Manam). 2014 మే 23న ప్రేక్షకుల ముందుకొచ్చింది. పదేళ్లు పూర్తయిన సందర్భంగా (10 years of manam movie) గురువారం ఈ సినిమాని పలు థియేటర్లలో రీ రిలీజ్‌ చేయనున్నారు. ఈ నేపథ్యంలో నాగార్జున (Nagarjuna) సోషల్‌ మీడియా వేదికగా ఓ వీడియో పంచుకున్నారు. నాటి జ్ఞాపకాలను నెమరువేసుకున్నారు. ‘‘మా కుటుంబానికి ఈ సినిమా ఎంతో ప్రత్యేకం. నాన్న ఆఖరి చిత్రమిది. ఎలాగైనా ఈ మూవీ క్లాసిక్‌గా నిలవాలని అనుకునేవారాయన. టీమ్‌ వర్క్‌తో అనుకున్నదే జరిగింది. దర్శకుడు విక్రమ్‌ కె.కుమార్‌, సంగీత దర్శకుడు అనూప్‌ రూబెన్స్‌.. ఇలా ఈ చిత్రానికి పని చేసిన వారందరికీ స్పెషల్‌ థ్యాంక్స్‌. కాస్త ఇబ్బంది పడుతూనే నాన్న సెట్స్‌కు వచ్చేవారు. మా అందరినీ నవ్వించేవారు. ఆయనకు పెద్ద స్క్రీన్‌పై ఈ చిత్రాన్ని చూపించలేకపోయాననే బాధ ఎప్పటికీ ఉంటుంది’’ అని అన్నారు.

దర్శకుడు విక్రమ్‌ సైతం ఆ సినిమా జ్ఞాపకాలు నెమరువేసుకున్నారు. ‘‘నాగేశ్వరరావు సర్‌కి స్క్రిప్టు వినిపించే సమయంలో.. నా చేయి తగిలి టేబుల్‌పై ఉన్న గ్లాసు కిందపడి పగిలిపోయింది. ఆ శబ్దానికి అక్కడ పనిచేసే కొందరు బాయ్స్‌ ఏం జరిగిందో అనుకుంటూ కంగారుగా వచ్చారు. డోర్‌ దగ్గర ఉన్నవారిని లోపలికి రావొద్దని ఏయన్నార్‌ చెప్పారు. కథలో అంతగా లీనమయ్యారాయన. నేను స్టోరీ చెప్పడం పూర్తయ్యాక వాళ్లు రూమ్‌ క్లీన్‌ చేశారు. ఆ క్షణాలు ఎప్పటికీ మరిచిపోలేను’’ అని పేర్కొన్నారు.