Nani: ‘దసరా’ కాంబోలో మరో సినిమా.. ప్రకటించిన నాని

హైదరాబాద్‌: టాలీవుడ్‌ కథానాయకుడు నాని (Nani) శ్రీకాంత్‌ ఓదెల దర్శకత్వంలో నటించిన ‘దసరా’ బాక్సాఫీస్‌ వద్ద హిట్‌ అందుకుంది. ఆ సినిమా విడదలై నేటికి ఏడాది పూర్తి కావడంతో నానీ తన 33వ సినిమా అప్‌డేట్‌ ఇచ్చారు. ఈ సినిమాకి కూడా శ్రీకాంతే దర్శకత్వం వహిస్తున్నారు. ఈ మేరకు పోస్టర్‌ రిలీజ్‌ చేస్తూ సోషల్ మీడియాలో ప్రకటించారు. ఎస్‌ఎల్వీ సినిమాస్‌ పతాకంపై సుధాకర్‌ చేకూరి నిర్మిస్తున్నారు. పూర్తి వివరాలు త్వరలో వెల్లడించనున్నారు. నాని తన 32వ సినిమాను సుజిత్‌ దర్శకత్వంలో చేయనున్న విషయం తెలిసిందే. డీవీవీ ఎంటర్‌టైన్‌మెంట్స్‌ ఈ చిత్రాన్ని నిర్మిస్తోంది. మరోవైపు ‘బలగం’ సినిమాతో దర్శకుడుగా మంచి గుర్తింపు తెచ్చుకున్న వేణు దర్శకత్వంలోనూ నాని నటించనున్నట్లు టాక్‌ వినిపిస్తోంది.

ప్రస్తుతం నాని ‘సరిపోదా శనివారం’ చిత్రంలో నటిస్తున్నారు. వివేక్‌ ఆత్రేయ దర్శకత్వంలో ఇది తెరకెక్కుతోంది. వీరిద్దరి కాంబినేషన్‌లో రూపుదిద్దుకుంటున్న రెండో సినిమా ఇది. ఇందులో నాని మాస్‌లుక్‌లో కనిపించనున్నారు. ప్రియాంక అరుళ్‌ మోహన్‌ కథానాయిక. ఎస్.జె.సూర్య కీలకపాత్రలో నటిస్తున్నారు. పాన్‌ ఇండియా స్థాయిలో తెలుగు, కన్నడ, మలయాళ, హిందీ భాషల్లో ఆగస్టు 29న విడుదల చేసేందుకు సన్నాహాలు చేస్తున్నారు.