Niharika: 11 మంది హీరోలను పరిచయం చేయనున్న నిహారిక!

ఇంటర్నెట్‌ డెస్క్‌: నటిగా అలరిస్తూనే ప్రొడ్యూసర్‌గా మారారు నిహారిక కొణిదెల (Niharika Konidela). ఇటీవల ‘పింక్‌ ఎలిఫెంట్‌ పిక్చర్స్‌’ (Pink Elephant Pictures) పేరుతో బ్యానర్‌ను నెలకొల్పారు. దీనిపై ఇప్పటి వరకు వెబ్‌ సిరీస్‌లు, షార్ట్‌ఫిల్మ్‌లను అందించారు. ఇప్పుడు సినిమాలను కూడా నిర్మించేందుకు సిద్ధమయ్యారు. తాజాగా ఈ బ్యానర్‌లో రానున్న తొలి చిత్రం గురించి సోషల్ మీడియాలో ఒక వార్త వైరల్‌ అవుతోంది.

కాన్సెప్ట్‌ ఓరియెంటెడ్‌ కథాంశంతో దీన్ని నిర్మించనున్నారట. యూత్‌ఫుల్‌ ఎంటర్‌టైనర్‌గా రూపొందనున్న ఈ చిత్రానికి ‘కమిటీ కుర్రాళ్లు’ అనే టైటిల్‌ను ఖారారు చేసినట్లు వార్తలు వస్తున్నాయి. వచ్చేనెల మొదటి వారంలో దీనిపై అధికారిక ప్రకటన వచ్చే అవకాశం కనిపిస్తోంది. మరో ఆసక్తికర విషయమేమిటంటే ఈ సినిమాతో ఆమె 11 మందిని హీరోలుగా, నలుగురిని హీరోయిన్లుగా పరిచయం చేయనున్నారట. అలాగే అనుదీప్ దేవ్‌ సంగీత దర్శకుడిగా టాలీవుడ్‌కు ఎంట్రీ ఇవ్వనున్నట్లు తెలుస్తోంది. ప్రస్తుతం ఇది షూటింగ్‌ దశలో ఉంది.

మరోవైపు నటిగానూ బిజీగా ఉన్నారు నిహారిక. ‘ఒక మనసు’తో కథానాయికగా వెండితెరకు పరిచయమైన ఆమె ప్రస్తుతం తెలుగు, తమిళ భాషల్లో సినిమాలు చేస్తున్నారు. మంచు మనోజ్‌ కథానాయకుడిగా వరుణ్‌ కోరుకొండ దర్శకత్వంలో తెరకెక్కుతోన్న ‘వాట్‌ ది ఫిష్‌’ (WHAT THE FISH) చిత్రంలో నటిస్తున్నారు. ఇందులో అష్టలక్ష్మి అనే యాక్షన్‌ ప్రధానంగా సాగే పాత్రలో కనిపించనున్నారు. కథానాయకుడు షేన్‌ నిగమ్‌ ప్రధాన పాత్రలో వస్తున్న ‘మద్రాస్‌కారన్‌’ అనే తమిళ సినిమాలోనూ హీరోయిన్‌గా యాక్ట్‌ చేస్తున్నారు. వాలి మోహన్‌ దాస్‌ దర్శకత్వంలో ఇది తెరకెక్కుతోంది.