Karthikeya 3: ‘కార్తికేయ 3’కి రంగం సిద్ధం

సరికొత్త సాహసంతో త్వరలోనే ‘కార్తికేయ 3’ తెరకెక్కనుందనే సంకేతాలిచ్చారు కథానాయకుడు నిఖిల్‌. ఈ సినిమా గురించి త్వరలోనే అధికారిక ప్రకటన వెలువడే అవకాశం ఉంది. నిఖిల్‌ కథానాయకుడిగా చందూ మొండేటి దర్శకత్వంలో తెరకెక్కిన ‘కార్తికేయ’, ‘కార్తికేయ2’ చిత్రాలు ఘన విజయాల్ని సొంతం చేసుకున్నాయి. ‘కార్తికేయ2’ అయితే పాన్‌ ఇండియా స్థాయిలో ప్రేక్షకుల్ని అలరించింది. అప్పట్నుంచి కొనసాగింపు చిత్రం కోసం దేశవ్యాప్తంగా ప్రేక్షకులు ఆసక్తి కనబరుస్తున్నారు. చిత్రబృందం కూడా అదే ప్రయత్నాల్లో ఉన్నట్టు తెలుస్తోంది. ‘కార్తికేయ 3’ రూపొందుతుందని నిఖిల్‌ సామాజిక మాధ్యమాల ద్వారా ధ్రువీకరించారు. చందూ మొండేటి ప్రస్తుతం నాగచైతన్య కథానాయకుడిగా ‘తండేల్‌’ తెరకెక్కిస్తున్నారు. అది పూర్తయ్యాక ‘కార్తికేయ 3’ పట్టాలెక్కే అవకాశాలున్నాయి. మరి ఈసారి డా.కార్తికేయ ఎలాంటి సాహసాలు చేస్తాడో చూడాలి.