Karthikeya 3: ‘కార్తికేయ 3’.. అధికారికంగా ప్రకటించిన నిఖిల్‌

హైదరాబాద్‌: దాదాపు రెండేళ్ల క్రితం విడుదలైన ‘కార్తికేయ 2’తో విశేష ఆదరణ సొంతం చేసుకున్నారు నటుడు నిఖిల్‌ (Nikhil). చందు మొండేటి దర్శకత్వం వహించిన ఈ చిత్రం దక్షిణాదితోపాటు బాలీవుడ్‌లోనూ సూపర్‌హిట్‌ అందుకుంది. దీనికి కొనసాగింపుగా రానున్న ‘కార్తికేయ 3’ కోసం ప్రేక్షకులు ఆసక్తిగా ఎదురుచూస్తున్నారు. ఈ నేపథ్యంలో ఆ ప్రాజెక్ట్‌పై అధికారిక ప్రకటన వెలువడింది. ‘‘సరికొత్త అడ్వెంచర్‌ను సెర్చ్‌ చేసే పనిలో డాక్టర్‌ కార్తికేయ నిమగ్నమయ్యారు. త్వరలో రానున్నాం’’ అని నిఖిల్‌ తాజాగా పోస్ట్‌ పెట్టారు. దీనిపై నెటిజన్లు ఆనందం వ్యక్తం చేస్తున్నారు. నిఖిల్‌ - చందు కాంబోలో మరో అడ్వెంచర్‌ థ్రిల్లర్‌ చూసేందుకు సిద్ధంగా ఉన్నామంటూ కామెంట్స్‌ పెడుతున్నారు. ఈ ప్రాజెక్ట్‌ స్క్రిప్ట్‌ పనులు జరుగుతున్నట్లు తెలుస్తోంది. గత చిత్రంతో పోలిస్తే ఇది భారీ స్థాయిలో ఉండనుందని టాక్‌.

చందు మొండేటి దర్శకత్వంలో నిఖిల్‌ హీరోగా రానున్న మూడో చిత్రమిది. 2014లో విడుదలైన ‘కార్తికేయ’తో ఈ కాంబో తొలి విజయాన్ని అందుకుంది. ‘కార్తికేయ 2’తో పాన్‌ ఇండియా స్థాయిలో గుర్తింపు తెచ్చుకున్నారు. కృష్ణతత్వం నేపథ్యంలో రూపుదిద్దుకున్న ఈ చిత్రంలో అనుపమ పరమేశ్వరన్‌, అనుపమ్‌ ఖేర్‌, హర్ష, శ్రీనివాసరెడ్డి కీలకపాత్రలు పోషించారు. కృష్ణతత్వాన్ని ఉద్దేశించి అనుపమ్‌ ఖేర్‌ చెప్పే డైలాగ్స్‌ సినిమాకే హైలైట్‌. నిఖిల్‌ ప్రస్తుతం ‘స్వయంభు’ కోసం వర్క్‌ చేస్తున్నారు. ‘తండేల్‌’ పనుల్లో చందు బిజీగా ఉన్నారు.