Parineeti Chopra: ప్రెగ్నెన్సీపై స్పందించిన పరిణీతి చోప్రా.. ఏమన్నారంటే!

ఇంటర్నెట్‌ డెస్క్‌: ప్రెగ్నెన్సీ రూమర్స్‌పై బాలీవుడ్‌ నటి పరిణీతి చోప్రా (Parineeti Chopra) స్పందించారు. తన తాజా చిత్రం ‘అమర్‌సింగ్ చంకీల’ ట్రైలర్‌ రిలీజ్ ఈవెంట్‌లో ఆమె పాల్గొన్నారు. ఆ కార్యక్రమానికి పరిణీతి వేసుకొచ్చిన దుస్తులు చూసి.. ‘తల్లి కానున్నారా’, ‘బేబీ బంప్‌’ కనిపించకుండా ఇలాంటి డ్రెస్‌ వేసుకున్నారా అంటూ కొందరు నెటిజన్లు పోస్ట్‌లు పెట్టారు. మరికొందరు ఆ పోస్ట్‌లకు ఆమెను ట్యాగ్‌ చేయడం ప్రారంభించారు. దీంతో తన ఇన్‌స్టా వేదికగా ఆమె ఈ వార్తలకు చెక్‌ పెట్టారు. 

‘ఫ్యాషన్‌ కోసం వదులుగా ఉండే దుస్తులు వేసుకున్నా.. పెద్ద సైజ్‌ డ్రెస్‌ ధరించినా.. సౌకర్యవంతంగా ఉండే ఇండియన్ కుర్తా వేసుకున్నా ప్రెగ్నెన్సీ అనే భావిస్తారా’ అంటూ నవ్వుతున్న ఎమోజీని జత చేశారు. దీంతో ఈ వార్తలకు ఫుల్‌స్టాప్‌ పడింది. గతేడాది సెప్టెంబర్‌లో ఆప్‌ ఎంపీ రాఘవ్‌ చద్దా (Raghav Chadha)ను ఆమె వివాహం చేసుకున్న సంగతి తెలిసిందే. ప్రస్తుతం పరిణీతి ‘అమర్‌సింగ్ చంకీల’ విడుదల కోసం ఆసక్తిగా ఎదురుచూస్తున్నారు. ఈ సినిమా కోసం ఆమె 10 కేజీల బరువు పెరిగినట్లు సహనటుడు దిల్జిత్ దొసాంజ్ తెలిపారు. 27 ఏళ్ల వయసులోనే హత్యకు గురైన సింగర్‌ అమర్‌ సింగ్ చంకీల జీవితం ఆధారంగా ఈ చిత్రాన్ని ఇంతియాజ్‌ అలీ తెరకెక్కించారు. నెట్‌ఫ్లిక్స్ వేదికగా ఇది విడుదల కానుంది. తాజాగా దీని ట్రైలర్‌ రిలీజ్ చేయగా అది ఆకట్టుకుంటోంది.