Pawan kalyan: ‘గ్లాస్‌..’ డైలాగ్‌పై మరోసారి స్పందించిన పవన్‌.. థ్యాంక్స్‌ చెప్పిన హరీశ్ శంకర్

ఇంటర్నెట్ డెస్క్‌: హరీశ్ శంకర్‌ దర్శకత్వంలో పవన్‌ కల్యాణ్‌ (Pawan Kalyan) హీరోగా నటిస్తోన్న సినిమా ‘ఉస్తాద్ భగత్‌ సింగ్‌’ (Ustaad Bhagat Singh). పవన్‌ కల్యాణ్ అభిమానులతో పాటు.. సినీ ప్రియులంతా ఈ చిత్రం కోసం ఎదురుచూస్తున్నారు. ఇప్పటికే విడుదలైన పోస్టర్స్‌, గ్లింప్స్‌ దీనిపై అంచనాలను పెంచగా.. తాజాగా పవన్‌ దీనిపై చేసిన కామెంట్స్‌ ఫ్యాన్స్‌లో జోష్‌ను పెంచాయి.

‘భగత్స్‌ బ్లేజ్‌’ పేరుతో ఇటీవల ఈ చిత్రబృందం ఓ ప్రత్యేక వీడియో పంచుకున్న విషయం తెలిసిందే. అందులో ‘గాజు పగిలే కొద్దీ పదునెక్కుద్ది’,  ‘గ్లాస్‌ అంటే సైజు కాదు.. సైన్యం.. కనిపించని సైన్యం’ అంటూ సాగే డైలాగ్స్‌ సోషల్ మీడియాను ఊపేశాయి. తాజాగా వీటిపై పవన్‌ ఓ మీటింగ్‌లో మాట్లాడారు. ‘‘సినిమాలో అలాంటి డైలాగులు ఎందుకని హరీశ్‌ను అడిగాను. ‘మీకు తెలియదు.. మా బాధలు మాకున్నాయి. ఇలాంటి డైలాగులు రాయకపోతే అభిమానులు ఊరుకోరు’ అని సమాధానం చెప్పాడు’’ అంటూ పవన్‌ ఆ డైలాగ్‌ చెప్పారు. దీనికి సంబంధించిన వీడియోను షేర్‌ చేసిన దర్శకుడు.. ‘మీ ప్రేమకు ధన్యవాదాలు సర్కార్‌. మీరు అంగీకరించాలే కానీ.. ఇలాంటివి ఇంకా రాస్తా’ అని క్యాప్షన్ పెట్టారు.

‘గబ్బర్‌సింగ్‌’ తర్వాత పవన్‌కల్యాణ్‌ (Pawan Kalyan) - హరీశ్‌ శంకర్‌ (Harish Shankar) కాంబోలో రూపొందుతోన్న చిత్రమిది. ఇందులో పవన్‌ పోలీస్‌ పాత్రలో కనిపించనున్నారు. ఆయన సరసన శ్రీలీల నటిస్తున్నారు. దేవీశ్రీ ప్రసాద్‌ సంగీతం అందిస్తున్నారు. ఈ సినిమాను మొదట గతేడాది డిసెంబర్‌లో విడుదల చేయాలని మేకర్స్‌ భావించారు. కొన్ని కారణాల వల్ల వాయిదా వేశారు.