Prabhas: తుది అంకానికి సన్నద్ధం

ప్రభాస్‌ మరో దఫా సెట్స్‌లో అడుగు పెట్టి తన చిత్రాన్ని పరుగులు పెట్టించనున్నారు. ఆయన కథానాయకుడిగా తెరకెక్కుతున్న ‘కల్కి 2898 ఎ.డి’ ఇప్పటికే విడుదల తేదీ ఖరారు చేసుకున్న విషయం తెలిసిందే. మే 9న ఆ చిత్రం ప్రేక్షకుల ముందుకు రానుంది. విడుదల తేదీ సమీపిస్తుండడంతో చిత్రబృందం మిగిలిన చిత్రీకరణని పూర్తి చేసే పనిలో ఉంది. సినిమాలోని తారాగణం మొత్తం పాల్గొననున్న కీలకమైన షెడ్యూల్‌ కోసం చిత్రబృందం కసరత్తులు మొదలుపెట్టింది. వచ్చే వారం నుంచే ఈ షెడ్యూల్‌ మొదలు కానున్నట్టు సమాచారం. ప్రభాస్‌, అమితాబ్‌ బచ్చన్‌, కమల్‌హాసన్‌, దీపికా పదుకొణె, దిశా పటానీతోపాటు... సినిమాలోని అతిథి పాత్రలు పోషిస్తున్న మరికొద్దిమంది కథానాయకులపై కూడా సన్నివేశాల్ని తెరకెక్కించనున్నారని సమాచారం. ఈ షెడ్యూల్‌తో చిత్రీకరణ దాదాపుగా పూర్తి కానుందని సమాచారం. నాగ్‌ అశ్విన్‌ దర్శకత్వంలో... వైజయంతీ మూవీస్‌ పతాకంపై అశ్వనీదత్‌ నిర్మిస్తున్న చిత్రమిది. సైన్స్‌ ఫిక్షన్‌ కథతో పురాణాలు, భవిష్యత్తు ఆధారంగా రూపొందుతోంది.