Prem Rakshit: మరోసారి రాజమౌళితో ‘నాటు నాటు’ కొరియోగ్రాఫర్‌

హైదరాబాద్‌: ఇటీవల ఆస్కార్‌ అందుకొని దుమ్మురేపింది ‘నాటు నాటు’ (Naatu Naatu) పాట. ఆ పాట ఆ స్థాయిలో విజయం సాధించడానికి కొరియోగ్రాఫర్‌ ప్రేమ్‌ రక్షిత్‌ (Prem Rakshit) కూడా ఓ కారణం. తన అద్భుతమైన డ్యాన్స్‌కు ప్రపంచం మొత్తం కాలు కదిపింది. తాజాగా ఓ ప్రముఖ మీడియాతో ప్రేమ్‌ రక్షిత్‌ మాట్లాడారు. తన తర్వాత ప్రాజెక్ట్‌ల గురించి, ఆస్కార్‌ అనుభవం గురించి పలు ఆసక్తికర విషయాలు పంచుకున్నారు.

‘‘ప్రస్తుతం నా ఆనందాన్ని వర్ణించడానికి మాటలు చాలవు. ఈ విజయంతో నేనే కాదు నా కుటుంబం కూడా చాలా ఆనందంగా ఉంది. ఆస్కార్‌ ఈవెంట్‌ కోసం మేము అమెరికా వెళ్లినప్పుడు చాలా ఎంజాయ్‌ చేశాం. వేదికపై ‘నాటు నాటు’ పాటకు విదేశీయులు డ్యాన్స్‌ చేస్తుంటే చాలా ఆనందం వేసింది. తాజాగా ప్రభుదేవా ఈ పాటకు తన బృందంతో కలిసి సెప్ట్స్‌ వేశారు. ఆ వీడియో చూసి చాలా ఆశ్చర్యపోయాను.  ప్రభుదేవాని ‘గాడ్‌ ఆఫ్‌ డ్యాన్స్‌’ అంటారు. అలాంటి వ్యక్తి నన్ను మొచ్చుకొని నా పాటకు డ్యాన్స్‌ వెయ్యడం ఎప్పటికీ మర్చిపోలేను. అది నాకు దక్కిన గొప్ప గౌరవంగా భావిస్తా’’ అని అన్నారు.

తన తదుపరి చిత్రాల గురించి మాట్లాడిన ప్రేమ్‌ రక్షిత్‌ ‘నాటు నాటు’ తర్వాత మరోసారి ఎన్టీఆర్‌ సినిమాకు పనిచేస్తున్నట్లు తెలిపారు. ‘‘ ఎన్టీఆర్‌ 30వ (NTR30) సినిమాకు నేను కొరియోగ్రాఫర్‌గా పని చేస్తున్నాను. త్వరలోనే రాజమౌళి (Rajamouli)తో కలిసి ఓ ప్రాజెక్ట్‌ చెయ్యనున్నా. దీనికి సంబంధించిన చర్చలు జరుగుతున్నాయి. మరో రెండు నెలల్లో ఆయన్ని కలవాలి’’ అని చెప్పారు. ఇక ఈ విషయం తెలిసిన నెటిజన్లు మరోసారి సూపర్‌ హిట్‌ కాంబో రిపీట్‌ అవుతున్నందుకు ఖుషీ అవుతున్నారు. రాజమౌళి విజన్‌కు ప్రేమ్‌రక్షిత్‌ టాలెంట్‌ కలిస్తే అది ఒక సెన్సెషనే అంటున్నారు.