Mohanlal: ఖురేషి అబ్రమ్‌ మళ్లీ వస్తున్నాడు

మోహన్‌లాల్‌ కథానాయకుడిగా పృథ్వీరాజ్‌ సుకుమారన్‌ తెరకెక్కించిన సినిమా ‘లూసిఫర్‌’. 2019లో విడుదలైన ఈ చిత్రం బాక్సాఫీస్‌ ముందు భారీ విజయాన్ని అందుకున్న సంగతి తెలిసిందే. ఇప్పుడీ సినిమాకి కొనసాగింపుగా ‘ఎల్‌2 ఎంపురాన్‌’ ప్రేక్షకుల ముందుకు రానుంది. ‘లూసిఫర్‌’, ‘బ్రో డాడీ’ విజయాల తర్వాత మోహన్‌లాల్‌ - పృథ్వీరాజ్‌ నుంచి వస్తున్న హ్యాట్రిక్‌ చిత్రమిది. దీనితోనే ప్రముఖ నిర్మాణ సంస్థ లైకా ప్రొడక్షన్స్‌ మలయాళ చిత్రసీమలోకి అడుగు పెడుతోంది. మంగళవారం మోహన్‌లాల్‌ పుట్టినరోజు సందర్భంగా ఈ చిత్రం నుంచి ఆయన ఫస్ట్‌లుక్‌ను విడుదల చేశారు. అందులో తను ఖురేషి అబ్రమ్‌గా స్టైలిష్‌ లుక్‌లో కనిపించారు. తొలి భాగంలో స్టీఫెన్‌ నెడుంపల్లిగా కనిపించిన మోహన్‌లాల్‌.. ఖురేషి అబ్రమ్‌గా ఎలా మారాడన్న రహస్యాన్ని ఈ సీక్వెల్‌లో చూపించనున్నారు. స్టైలిష్‌ యాక్షన్‌ థ్రిల్లర్‌గా రూపొందుతోన్న ఈ సినిమా చిత్రీకరణ ప్రస్తుతం తిరువనంతపురంలో జరుగుతోంది. త్వరలోనే గుజరాత్, యూఏఈల్లో చిత్రీకరణ జరపనున్నారు. ఈ సినిమా తెలుగు, తమిళ, హిందీ, కన్నడ, మలయాళ భాషల్లో వచ్చే ఏడాది ప్రేక్షకుల ముందుకు రానుంది. దీంట్లో టోవినో థామస్, మంజు వారియర్, నందు తదితరులు ముఖ్య పాత్రలు పోషిస్తున్నారు. దీపిక్‌ దేవ్‌ సంగీతమందిస్తుండగా.. సుజిత్‌ వాసుదేవ్‌ ఛాయాగ్రాహకుడిగా వ్యవహరిస్తున్నారు.