Rana Daggubati: అప్పుడు పెద్ద సవాలు ఎదుర్కొన్నా.. అందుకే నటుణ్ని అయ్యా: రానా

ఇంటర్నెట్‌ డెస్క్‌: నిర్మాతగా కొనసాగుతున్న సమయంలో తానో పెద్ద సవాలు ఎదుర్కొన్నానని రానా దగ్గుబాటి (Rana Daggubati) తెలిపారు. తాను ఎందుకు నటనపైపు రావాల్సి వచ్చిందో వివరించారు. తాజాగా పాల్గొన్న ఓ కాన్‌క్లేవ్‌లో ఆయన మాట్లాడారు. తాను నిర్మాతగా వ్యవహరించిన తొలి సినిమా ‘బొమ్మలాట’ (Bommalata).. రెండు జాతీయ అవార్డులు గెలుచుకుందని తెలిపారు. నేషనల్‌ అవార్డ్స్‌ అందుకున్నా ఇండిపెండెంట్‌ ఫిల్మ్‌కావడంతో అది థియేటర్లలో విడుదలవ్వలేదని ఆవేదన వ్యక్తం చేశారు. ప్రేక్షకులకు తాను చెప్పాలనుకున్న కథలను తీసుకోమని టెక్నిషియన్ల చుట్టూ రెండేళ్లపాటు తిరిగినా ఫలితం లేకపోయిందన్నారు. నిర్మాతగా తాను అనుకున్నది జరగకపోవడంతో నటుడిగా మారానని తెలిపారు. కొత్త కాన్సెప్ట్‌ల ఎంపిక విషయంలో చిత్ర పరిశ్రమను ఒప్పించడం చాలా కష్టమైన పని అని అభిప్రాయపడ్డారు. అయితే, ప్రస్తుతం కొంత మార్పు వచ్చిందని పేర్కొన్నారు.

సినిమాల విషయంలో తనకు చిన్నప్పటి నుంచీ భాషా బేధాల్లేవని స్పష్టం చేశారు. చెన్నైలో పెరిగిన తాను తమిళ్‌, తెలుగు, మలయాళం, ఇంగ్లిష్‌ చిత్రాలు చూసినట్టు తెలిపారు. నటుడైన తర్వాత అదే ధోరణితో ఉన్నానన్నారు. భాష కంటే సినిమా కథ ముఖ్యమని పేర్కొన్నారు. చిన్న చిత్రాలైనా కంటెంట్‌ బాగుంటే రానా హీరో అయిన తర్వాతా వాటిని ప్రోత్సహించేవారు. ‘కేరాఫ్‌ కంచరపాలెం’, ‘కృష్ణ అండ్‌ హిజ్‌ లీల’, ‘777 చార్లి’, ‘గార్గి’ చిత్రాలను సమర్పించారు. తిరువీర్‌ ప్రధాన పాత్ర పోషించిన ‘పరేషాన్‌’ (Pareshan) చిత్రం రానా సమర్పణలో జూన్‌ 2న విడుదల కానుంది. తన బాబాయ్‌, ప్రముఖ హీరో వెంకటేశ్‌ (venkatesh)తో కలిసి ‘రానా నాయుడు’ (rana naidu) వెబ్‌సిరీస్‌లో రానా సందడి చేసిన సంగతి తెలిసిందే. ఈ సిరీస్‌ ఓటీటీ (ott) ‘నెట్‌ఫ్లిక్స్‌’ (netflix)లో స్ట్రీమింగ్‌ అవుతోంది.