Rana naidu: భారత్‌ నుంచి ఒకే ఒక్కడు రానా నాయుడు

విమర్శల మధ్య విడుదలైనా సరే..ప్రేక్షకులను మెప్పించడంతో పాటు మంచి ఘనతను పొందవచ్చని మరోసారి రుజువు చేసింది ‘రానా నాయుడు’ సిరీస్‌. అమెరికన్‌ టీవీ సిరీస్‌ ‘రే డొనోవన్‌’కు రీమేక్‌గా ఈ ప్రాజెక్టు రూపొందింది. అగ్రకథానాయకుడు వెంకటేశ్‌, రానా తండ్రీ కొడుకులుగా కనిపించిన ఈ సిరీస్‌ వివాదాల్లో నిలిచినప్పటికీ బ్లాక్‌బస్టర్‌ విజయాన్ని అందుకుంది. ఇప్పుడీ సిరీస్‌ అరుదైన ఘనతను సాధించింది. 2023 జనవరి నుంచి జూన్‌ వరకు ఎక్కువ వ్యూస్‌ వచ్చిన వాటి వివరాలను ‘వాట్‌ వి వాచ్డ్‌’ అనే పేరుతో ఓ జాబితాను నెట్‌ఫ్లిక్స్‌ తాజాగా విడుదల చేసింది. ఇందులో ‘రానా నాయుడు’ చోటు దక్కించుకుంది. అంతేకాదు ఆ జాబితాలో భారత్‌ నుంచి ఈ ఒక్క సిరీస్‌ మాత్రమే ఉండటం విశేషం. 2021 నుంచి ప్రతి వారం ఎక్కువమంది వీక్షించిన టాప్‌ 10 సినిమాలు, వెబ్‌ సిరీస్‌ల జాబితాను నెట్‌ఫ్లిక్స్‌ విడుదల చేస్తూ వస్తోంది. ఈసారి కూడా ఆ తరహాలోనే సుమారు 18వేల టైటిల్స్‌ డేటాను పరిశీలించింది. ప్రపంచవ్యాప్తంగా ఎక్కువ మంది ప్రేక్షకులు వీక్షించిన టాప్‌ 400 టైటిల్స్‌ను విడుదల చేసింది. ఇందులో ‘రానా నాయుడు’ 336 స్థానంలో నిలిచింది. ఈ సిరీస్‌ను 46మిలియన్ల గంటల పాటు అభిమానులు చూసినట్లు నెట్‌ఫ్లిక్స్‌ సంస్థ తెలిపింది. ఇక ఇటీవలే ఈ సిరీస్‌కు సీక్వెల్‌ ఉన్నట్లు ప్రకటించారు. మరెన్నో మలుపులతో, కొత్త కథనంతో మరింత యాక్షన్‌ డ్రామాతో త్వరలో ప్రేక్షకులను అలరించనుందని తెలిపింది సిరీస్‌బృందం.