Ramayan: విలువిద్య నేర్చుకుంటోన్న రణ్‌బీర్‌...‘రామాయణం’ కోసమేనా?

ఇంటర్నెట్‌ డెస్క్‌: బాలీవుడ్‌లో రానున్న ‘రామాయణం’ (Ramayan) సినిమా అప్‌డేట్‌ కోసం ప్రేక్షకులు ఆసక్తిగా ఎదురుచూస్తున్నారు. భారీ బడ్జెట్‌తో రూపొందుతున్న ఈ చిత్రానికి నితీశ్‌ తివారీ దర్శకత్వం వహించనున్నారు. ఇందులో రాముడిగా ప్రముఖ హీరో రణ్‌బీర్‌ కపూర్‌ (Ranbir Kapoor), సీతగా సాయి పల్లవి (Sai Pallavi), రావణుడిగా యశ్‌ కనపించనున్నట్లు ప్రచారం జరుగుతోంది. దీంతో ఈ సినిమాపై భారీ అంచనాలు నెలకొన్నాయి.

తాజాగా రణ్‌బీర్‌ విలువిద్యలు నేర్చుకుంటూ, వ్యాయామం చేస్తూ ఉన్న ఫొటోలు ఆర్చరీ కోచ్‌ ఎక్స్‌లో పోస్ట్‌ చేశారు. ప్రస్తుతం ఆ ఫొటోలు సోషల్‌మీడియాలో వైరల్‌ అవుతున్నాయి. రాముడి పాత్రలో రణ్‌బీర్‌ ఖరారైనట్లేనని అభిమానులు భావిస్తున్నారు. రణ్‌బీర్‌, సాయి పల్లవి, యశ్‌లతో పాటు హనుమంతుడిగా సన్నీ దేవోల్‌, కైకేయిగా లారా దత్తా, శూర్పణఖ పాత్రలో రకుల్‌ ప్రీత్‌ పేర్లు వినిపిస్తున్నాయి. ఏప్రిల్‌లో ఈ ప్రాజెక్ట్‌కు సంబంధించిన అధికారిక ప్రకటన వచ్చే అవకాశం ఉన్నట్లు తెలుస్తోంది. శ్రీరామ నవమి సందర్భంగా చిత్రబృందం అప్‌డేట్‌ ఇవ్వనున్నట్లు వార్తలొస్తున్నాయి.

సందీప్‌ రెడ్డి వంగా తెరకెక్కించిన ‘యానిమల్‌’ చిత్రంతో బాక్సాఫీస్‌ హిట్‌ అందుకున్నారు రణ్‌బీర్‌ కపూర్. ఈ సినిమాకి సీక్వెల్‌గా రానున్న ‘యానిమల్‌ పార్క్‌’లో నటించనున్నారు. సంజయ్‌ లీలా భన్సాలీ రూపొందించనున్న మల్టీస్టారర్‌ ప్రేమకథా చిత్రంలోనూ కీలక పాత్ర పోషించనున్నారు.