Ravi Teja: బచ్చన్‌.. యాక్షన్‌

రవితేజ కథానాయకుడిగా హరీశ్‌ శంకర్‌ తెరకెక్కిస్తున్న చిత్రం ‘మిస్టర్‌ బచ్చన్‌’. ‘షాక్‌’, ‘మిరపకాయ్‌’ లాంటి చిత్రాల తర్వాత ఈ ఇద్దరి కలయికలో వస్తున్న హ్యాట్రిక్‌ సినిమా ఇది. పీపుల్‌ మీడియా ఫ్యాక్టరీ సంస్థ నిర్మిస్తోంది. భాగ్యశ్రీ బోర్సే కథానాయిక. శుక్రవారం రవితేజ పుట్టినరోజు. ఈ సందర్భంగా ఈ చిత్రం నుంచి కొత్త లుక్‌ విడుదల చేశారు. అందులో రవితేజ తన చుట్టూ ఉన్న గూండాల్ని చితకొట్టి  స్టైలిష్‌గా నడిచొస్తున్నట్లు కనిపించారు. ఈ సినిమా చిత్రీకరణ ప్రస్తుతం కరైకుడిలో జరుగుతోంది. ఇందులో భాగంగా రవితేజపై కీలక సన్నివేశాలు తెరకెక్కిస్తున్నారు. ఈ చిత్రానికి సంగీతం: మిక్కీ జె మేయర్‌, ఛాయాగ్రహణం: అయనంక బోస్‌.

ఈగల్స్‌ ఆన్‌ హిస్‌ వే..

‘ఈగల్‌’గా ప్రేక్షకుల్ని అలరించేందుకు సిద్ధమవుతున్నారు రవితేజ. ఆయన హీరోగా నటించిన ఈ చిత్రాన్ని కార్తీక్‌ ఘట్టమనేని తెరకెక్కించిన సంగతి తెలిసిందే. వచ్చే నెల 9న ప్రేక్షకుల ముందుకు రానుంది. ఈ నేపథ్యంలోనే శుక్రవారం ఈ సినిమా నుంచి ‘‘ఈగల్స్‌ ఆన్‌ హిస్‌ వే’’ అనే గీతాన్ని విడుదల చేశారు. దీనికి డేవ్‌ జాంద్‌ స్వరాలు సమకూర్చారు. జార్జినా మాథ్యూ సాహిత్యమందించడంతో పాటు స్వయంగా ఆలపించారు. స్టైలిష్‌ యాక్షన్‌ థ్రిల్లర్‌గా రూపొందిన ఈ చిత్రంలో అనుపమ పరమేశ్వరన్‌, కావ్య థాపర్‌ కథానాయికలు.