Sakshi Vaidya: మలయాళ సీమలోకి ‘ఏజెంట్‌’ సుందరి

‘ఏజెంట్‌’ చిత్రంతో తెలుగు తెరకు పరిచయమైన కొత్త అందం సాక్షి వైద్య. ఆ సినిమా ఆమెకు చేదు ఫలితాన్ని అందించినా.. వెంటనే ‘గాండీవధారి అర్జున’లో అవకాశం దక్కించుకుంది. కానీ, అదీ ఆమెకు ఆశించిన ఫలితాన్ని అందివ్వలేదు. అయితే ఇప్పుడామె ‘హాల్‌’ అనే సినిమాతో మలయాళంలో అదృష్టం పరీక్షించుకునేందుకు సిద్ధమైంది. ఈ విషయాన్ని ఆమె స్వయంగా సామాజిక మాధ్యమాల వేదికగా వెల్లడిస్తూ టైటిల్‌ పోస్టర్‌ను పంచుకుంది. షేన్‌ నిగమ్‌ హీరోగా నటిస్తున్న ఈ చిత్రాన్ని ప్రశాంత్‌ విజయ్‌ కుమార్‌ తెరకెక్కిస్తున్నారు. జేవీజే ప్రొడక్షన్స్‌ సంస్థ నిర్మిస్తోంది. ఇదొక భిన్నమైన మ్యూజికల్‌ రొమాంటిక్‌ ఎంటర్‌టైనర్‌గా రూపొందనున్నట్లు తెలుస్తోంది. వచ్చే నెల నుంచి చిత్రీకరణ ప్రారంభం కానుంది. ఈ ఏడాదిలోనే ప్రేక్షకుల ముందుకు రానుంది. ఈ సినిమాకి నందగోపాలన్‌ సంగీతమందిస్తున్నారు. ఇక సాక్షి ప్రస్తుతం తెలుగులో శర్వానంద్‌కు జోడీగా రామ్‌ అబ్బరాజు తెరకెక్కిస్తున్న చిత్రంలో నటిస్తోంది. ఇది ఇటీవలే చిత్రీకరణ ప్రారంభించుకుంది.