Salaar 2: ‘సలార్‌ 2’ షూటింగ్‌ అప్‌డేట్‌ ఇచ్చిన నటుడు

ఇంటర్నెట్‌ డెస్క్‌: ‘సలార్‌ 2’ (Salaar) సినిమాకు సంబంధించి నటుడు బాబీ సింహా ఓ అప్‌డేట్‌ ఇచ్చారు. ఏప్రిల్‌లో షూటింగ్‌ ప్రారంభమయ్యే అవకాశాలున్నాయని చెప్పారు. తాజాగా పాల్గొన్న ఓ ఇంటర్వ్యూలో ఆయన మాట్లాడారు. ‘సలార్‌ 1’ విడుదల తర్వాత ఇటీవల ఓ వేడుకలో ప్రభాస్‌ని కలిశానని గుర్తు చేసుకున్నారు. ప్రభాస్‌ హీరోగా తెరకెక్కిన ఈ చిత్రంలో బాబీ సింహా (Bobby Simha) కీలక పాత్ర పోషించిన సంగతి తెలిసిందే.

ప్రశాంత్‌ నీల్‌ దర్శకత్వంలో వచ్చిన ‘సలార్‌ పార్ట్‌ 1: సీజ్‌ఫైర్‌’ (Salaar: Part 1- Ceasefire) గతేడాది డిసెంబరు 22న విడుదలై, మంచి విజయం అందుకుంది. దానికి సీక్వెల్‌గా పార్ట్‌ 2ను ‘శౌర్యాంగ పర్వం’ పేరుతో రూపొందించనున్నారు. ఈ సినిమా ఎప్పుడెప్పుడు మొదలవుతుందా? అని ప్రభాస్‌ అభిమానులు, సినీ ప్రియులు ఆసక్తిగా ఎదురుచూశారు. బాబీ సింహా ఇచ్చిన అప్‌డేట్‌ ప్రకారం పార్ట్‌ 2 వచ్చే ఏడాదిలో సినిమా విడుదల కావొచ్చు.

కొన్నిరోజుల క్రితం ఈ సీక్వెల్‌ గురించి నిర్మాత విజయ్‌ కిరగందూర్‌ మాట్లాడుతూ.. స్క్రిప్టు పూర్తయిందని, ప్రభాస్‌- ప్రశాంత్‌ చిత్రీకరణ ప్రారంభించేందుకు ఆసక్తిగా ఉన్నారని తెలిపారు. పార్ట్‌ 1 వసూళ్లపై సంతృప్తిగా ఉన్నామన్నారు. హాలీవుడ్‌ సిరీస్‌ ‘గేమ్‌ ఆఫ్‌ థ్రోన్స్‌’ (Game of Thrones)లా ‘సలార్‌ 2’ ఉంటుందంటూ ప్రేక్షకుల అంచనాలు రెట్టింపు చేశారు.