Salaar Teaser: మాస్‌ యాక్షన్‌ సలార్‌

‘సలార్‌’ ప్రపంచంలోకి అభిమానులకు స్వాగతం పలికారు ప్రభాస్‌. ఆయన హీరోగా నటించిన ఈ పాన్‌ ఇండియా చిత్రాన్ని ప్రశాంత్‌ నీల్‌ తెరకెక్కించిన సంగతి తెలిసిందే. హోంబలే ఫిలింస్‌ సంస్థ నిర్మిస్తోంది. శ్రుతిహాసన్‌ కథానాయిక. పృథ్వీరాజ్‌ సుకుమారన్‌, జగపతిబాబు తదితరులు కీలక పాత్రలు పోషించారు. ఈ చిత్ర టీజర్‌ (Salaar Teaser) గురువారం విడుదలైంది. ‘‘సింహం.. చిరుత.. పులి.. ఏనుగు.. ఇవన్నీ చాలా ప్రమాదకరం. కానీ, జురాసిక్‌ పార్క్‌లో కాదు. ఎందుకంటే ఆ పార్కులో..’’ అంటూ టీనూ ఆనంద్‌ డైలాగ్‌తో ప్రభాస్‌ పాత్రను.. అతని ప్రపంచాన్ని పరిచయం చేసిన తీరు ఆసక్తి రేకెత్తించింది. దాదాపు నిమిషంన్నరకు పైగా నిడివి ఉన్న ఈ ప్రచార చిత్రంలో ప్రభాస్‌ నుంచి ఒక్క డైలాగ్‌ వినిపించకున్నా.. ఆయన పాత్రకు ఇచ్చిన మాస్‌ ఎలివేషన్స్‌.. రకరకాల ఆయుధాలతో శత్రువుల్ని వేటాడుతున్న తీరు ప్రత్యేక ఆకర్షణగా నిలిచాయి. ఈ టీజర్‌తోనే సినిమా రెండు భాగాలుగా రానున్నట్లు చిత్ర బృందం స్పష్టత ఇచ్చేసింది. తొలి భాగం ‘సలార్‌: పార్ట్‌1: సీజ్‌ ఫైర్‌’ పేరుతో సెప్టెంబరు 28న ప్రేక్షకుల ముందుకు రానుంది. ఈ యాక్షన్‌ థ్రిల్లర్‌ కోసం రామోజీ ఫిల్మ్‌సిటీలో 14 భారీ సెట్స్‌ వేసి మరీ చిత్రీకరణ జరిపినట్లు చిత్ర వర్గాలు తెలిపాయి. ఈ సినిమాకి సంగీతం: రవి బస్రూర్‌, ఛాయాగ్రహణం: భువన గౌడ.