Samyukta Menon: తెలుగు సినిమా నేర్పించింది అదే!

బాలీవుడ్‌లోకి అడుగు పెట్టిన వర్తమాన కథానాయికల జాబితాలో మరొకరు చేరారు. ఈమధ్యే వరుసగా దక్షిణాది భామలు హిందీ సినిమాల్లో అవకాశాలు అందుకుంటున్నారు. ఆ వరసలో సంయుక్త మేనన్‌ కూడా చేరారు. 

తెలుగులో ఈమె పట్టిందంతా బంగారమే. విజయాలకి కేరాఫ్‌గా మారారు. మంచి కథల్ని, నటనకి ప్రాధాన్యమున్న పాత్రల్ని ఎంపిక చేసుకుంటుందనే పేరు తెచ్చుకున్నారు. హిందీలో చేస్తున్న తొలి చిత్రం విషయంలోనూ ఆమె తనదైన పంథాని అనుసరిస్తోంది. అగ్ర కథానాయకుల సరసన కాకుండా... ఓ కీలక పాత్రని ఎంపిక చేసుకొని అక్కడ జెండా పాతేందుకు సిద్ధమైంది. ప్రభుదేవా, కాజోల్‌ ప్రధాన పాత్రలు పోషిస్తున్న సినిమాతో సంయుక్త మేనన్‌ హిందీలో పరిచయం అవుతోంది. ఆమె ఇందులో ఓ కీలక పాత్రని పోషిస్తుందన్నమాట. మూస పద్ధతుల్ని పక్కనపెట్టి ప్రయాణం చేయడమే నా పంథా అని చెప్పే సంయుక్త... ‘‘ఏ భాషలోకి వెళ్లినా అక్కడి పరిస్థితుల్ని, పని విషయంలో పద్ధతుల్ని  వెంటనే ఆకళింపు చేసుకుని నటించడం అలవాటైంది. అది తెలుగు సినిమానే నేర్పించింద’’ని చెబుతోంది సంయుక్త.