Saripodhaa Sanivaaram: పోరాటానికి శనివారం సరిపోదా!

‘హాయ్‌ నాన్న’ అంటూ సినీప్రియుల్ని పలకరించేందుకు సిద్ధమవుతున్నారు నాని. ఓ వైపు ఈ చిత్ర ప్రచార కార్యక్రమాల్ని పరుగులు పెట్టిస్తూనే మరోవైపు తన కొత్త చిత్రం ‘సరిపోదా శనివారం’ను పట్టాలెక్కించేశారు. ‘అంటే సుందరానికీ’ తర్వాత వివేక్‌ ఆత్రేయ - నాని కలయికలో రూపొందుతోన్న రెండో సినిమా ఇది. డీవీవీ దానయ్య, కల్యాణ్‌ దాసరి సంయుక్తంగా నిర్మిస్తున్నారు. ప్రియాంక అరుల్‌ మోహన్‌ కథానాయిక. ఎస్‌.జె.సూర్య కీలక పాత్ర పోషిస్తున్నారు. దీపావళి సందర్భంగా హైదరాబాద్‌లో రెగ్యులర్‌ చిత్రీకరణను ప్రారంభించారు. ప్రస్తుతం రామ్‌-లక్ష్మణ్‌ మాస్టర్స్‌ నేతృత్వంలో ఓ భారీ యాక్షన్‌ ఎపిసోడ్‌ తెరకెక్కిస్తున్నట్లు చిత్ర నిర్మాతలు సామాజిక మాధ్యమాల్లో వెల్లడించారు. అలాగే ప్రధాన తారాగణంపై కీలక సన్నివేశాలు చిత్రీకరించనున్నట్లు తెలిపారు. వినూత్నమైన యాక్షన్‌ ఎంటర్‌టైనర్‌గా రూపొందనున్న ఈ చిత్రంలో నాని రగ్గడ్‌ లుక్‌లో కనిపించనున్నారు. ఈ సినిమాకి జేక్స్‌ బిజోయ్‌ స్వరాలు సమకూరుస్తుండగా.. జి.మురళీ ఛాయాగ్రాహకుడిగా వ్యవహరిస్తున్నారు.