shah rukh khan: మళ్లీ ఎప్పుడూ విరామం తీసుకోను

చిత్రపరిశ్రమలో దాదాపు నాలుగేళ్ల తర్వాత.. తన సినిమాలతో ప్రేక్షకులను అదరగొట్టారు బాలీవుడ్‌ అగ్రకథానాయకుడు షారుక్‌ ఖాన్‌. ‘పఠాన్‌’, ‘జవాన్‌’, ‘డంకీ’.. గతేడాది విడుదలైన ఈ సినిమాలతో సినీప్రియులను విశేషంగా ఆకట్టుకొని.. బాక్సాఫీసును షేక్‌ చేశారు. తాజాగా జరిగిన ఓ ఇంటర్య్వూలో తను సినిమాల నుంచి విరామం తీసుకోవడం గురించి కొన్ని ఆసక్తికర విషయాలను పంచుకున్నారు షారుక్‌. ‘‘చిత్ర పరిశ్రమలో 33ఏళ్లుగా ప్రేక్షకులను అలరిస్తూనే ఉన్నాను. కానీ.. ఈ మధ్యలో నేను చాలా రోజులు సినిమాలకు గ్యాప్‌ ఇచ్చాను. నేను తెరపై కనిపిస్తానో లేదోనని అభిమానులు భయపడ్డారు. వరసగా నేను నటించిన చిత్రాలు ప్రేక్షకులను మెప్పించలేదు. దీంతో నేను మంచి కథలను ఎంచుకోవడం లేదేమో అని అనుకున్నాను. అందుకే ఈ ఏడాది ‘పఠాన్‌’, ‘జవాన్‌’ లాంటి చిత్రాలతో మీ ముందుకు వచ్చాను. ఇకపై ఎప్పుడూ నేను విరామం తీసుకోను. ఇంకోసారి అలా జరగదు. నా సినిమాల కన్నా ఎక్కువగా.. నాపై ప్రేమ చూపుతూ నన్ను ఆదరిస్తున్న అభిమానులకు ధన్యవాదాలు’’ అంటూ చెప్పుకొచ్చారు.