సిద్ధార్థ్‌.. కృతి.. ఓ ప్రేమకథ?

‘క్రూ’.. ఇటీవలే విడుదలైన ఈ చిత్రంలో ఎయిర్‌హోస్టెస్‌గా కనిపించి సినీప్రియుల మనసు దోచుకుంది బాలీవుడ్‌ నాయిక కృతి సనన్‌. త్వరలో ‘దో పత్తి’తో తెరపై సందడి చేయడానికి ముస్తాబవుతున్న ఈ భామ.. ఇప్పుడు మరో కొత్త ప్రాజెక్టుకు పచ్చ జెండా ఊపినట్లు తెలుస్తోంది. ఈ ఏడాది ‘యోధ’తో మంచి విజయాన్ని అందుకున్న సిద్ధార్థ్‌ మల్హోత్రాతో ఆమె జోడీ కట్టునున్నట్లు సమాచారం. ‘‘మడాక్‌ ఫిలింస్‌ మరో సరికొత్త జోడీని తెరకు పరిచయం చేయనుంది. కృతి, సిద్ధార్థ్‌ కలయికలో ఓ స్వచ్ఛమైన ప్రేమకథను సిద్ధం చేస్తుంది. వీరిద్దరి కాంబినేషన్‌లో మొదటిసారి రాబోతున్న ఈ చిత్రాన్ని ఎంతో ప్రత్యేకంగా తీర్చిదిద్దుతున్నారు. ప్రస్తుతం ఈ ప్రాజెక్టు గురించి వీరిద్దరితో చర్చలు జరుపుతోంది చిత్రబృందం. దీనికి సంబంధించిన వివరాల్ని త్వరలో వెల్లడించడానికి సన్నాహాలు చేస్తున్నారు’’ అని చిత్ర నిర్మాణ సంస్థకు చెందిన సన్నిహిత వర్గాలు తెలిపాయి. ప్రస్తుతం సిద్ధార్థ్‌ ‘స్పైడర్‌’ అనే సినిమా చిత్రీకరణలో బిజీగా ఉన్నట్లు సమాచారం.