Sudheer Babu: ‘మీ సినిమా ఎందుకు చూడాలి?’.. నెటిజన్‌కు సుధీర్‌ రిప్లై ఏంటంటే

ఇంటర్నెట్‌ డెస్క్‌: సుధీర్‌బాబు (Sudheer Babu) ప్రధాన పాత్రలో దర్శకుడు మహేశ్‌ తెరకెక్కించిన చిత్రం ‘హంట్‌’ (Hunt). శ్రీకాంత్‌ (Srikanth), భరత్‌ (Bharath) కీలక పాత్రలు పోషించారు. ఈ సినిమా గురువారం ప్రేక్షకుల ముందుకు రానుంది. ఈ నేపథ్యంలో ట్విటర్‌ వేదికగా అభిమానులతో చిట్‌చాట్‌ నిర్వహించారు సుధీర్‌. మరి, ఫ్యాన్స్‌ ఏం అడిగారో, ఆయన ఎలా స్పందించారో చదివేయండి..

❓ ఈ సినిమాను ఎందుకు చూడాలో ఒక్క మాటలో చెప్పండి?

సుధీర్‌: ఇప్పటి వరకూ నేనే కాదు తెలుగు చలన చిత్ర పరిశ్రమలో ఎవరూ చేయని సబ్జెక్ట్‌ ఇది. సినిమాను చూసేందుకు అదే బలమైన కారణం.

❓ ఈ చిత్రంలో కథానాయిక ఎవరు?

సుధీర్‌: నేను ఇంతకు ముందు చెప్పినట్టు ఇందులో లవ్‌ లేదు. ప్రస్తుతానికి థ్రిల్‌ మాత్రమే.

❓ హీరోయిన్‌ పాత్ర లేకుండా, కమర్షియాలిటీకి భిన్నంగా తీసిన సినిమా కదా. మీ ధైర్యమేంటి?

సుధీర్‌: మంచి స్క్రిప్ట్ సినిమాకి అతి పెద్ద కమర్షియల్ అంశం అని నేను నమ్ముతా.

❓ ‘హంట్‌’ సీక్వెల్‌ ఆశించొచ్చా?

సుధీర్‌: ఎందుకు ఆశించకూడదు!

❓ మీతో కలిసి ‘హంట్‌’ సినిమా చూడాలని ఉంది. కుదురుతుందా?

సుధీర్‌: రేపు (గురువారం) ఉదయం ప్రసాద్‌ ఐమ్యాక్స్‌కు వచ్చేయండి బ్రదర్‌.

❓ మీరు పూర్తి స్థాయి కామెడీ చిత్రంలో నటించే అవకాశం ఉందా?

సుధీర్‌: ఆ పనిలోనే ఉన్నా. ‘మామా మశ్చీంద్రా’ సినిమా కోసం వేచి చూడండి.

❓ ఫుల్‌ లెంగ్త్‌ కమర్షియల్‌ చిత్రం ఎప్పుడు చేస్తారు?

సుధీర్‌: నా తదుపరి ప్రాజెక్టుల్లో కమర్షియల్‌ కథలు చాలానే ఉన్నాయి.

❓ ‘హరోంహర’ సినిమా అప్‌డేట్‌ ఇస్తారా?

సుధీర్‌: దానికి ఇంకా సమయం ఉంది సోదరా. ప్రస్తుతానికి ‘హంట్‌’ గురించి మాట్లాడుకుందాం.

❓ దర్శకత్వం చేసే అవకాశం వస్తే పవన్ కల్యాణ్‌తో ఎలాంటి చిత్రం తీస్తారు?

సుధీర్‌: పవన్‌ కల్యాణ్‌కు మార్షల్‌ ఆర్ట్స్‌పై మంచి పట్టుంది. గతంలో ఆయన చేసిన ‘జానీ’ తరహా చిత్రం చేస్తా.

❓ మీకు స్ఫూర్తి ఎవరు?

సుధీర్‌: మంచి నటులందరూ. మంచి సినిమాలన్నీ.