Suriya: సూర్య సినిమా ఆగిపోలేదు.. వెట్రిమారన్‌ ఏమన్నారంటే..

ఇంటర్నెట్‌డెస్క్‌: సూర్య (Suriya) హీరోగా వెట్రిమారన్‌.. ‘వాడి వాసల్‌’ (Vaadivaasal) చిత్రాన్ని మూడేళ్ల క్రితం ప్రకటించిన సంగతి తెలిసిందే. పలు కారణాల వల్ల ఈ సినిమా షూటింగ్‌ నిలిచిపోయింది. దీంతో ఈ ప్రాజెక్ట్‌ ఆగిపోయిందంటూ ఇప్పటికే పలు సందర్భాల్లో వార్తలు వచ్చాయి. ఆయా కథనాలను కొట్టిపారేస్తూ వెట్రిమారన్‌ తాజాగా ఆసక్తికర అప్‌డేట్‌ ఇచ్చారు. ప్రస్తుతం తాను ‘విడుతలై పార్ట్‌2’ చిత్రీకరణలో బిజీగా ఉన్నానని చెప్పారు. అది పూర్తైన తర్వాత తప్పకుండా ‘వాడి వాసల్‌’ రెగ్యులర్‌ షూట్‌ తిరిగి మొదలుపెడతానని స్పష్టతనిచ్చారు. అనంతరం ఆయన ధనుష్‌తో చేయనున్న ‘వడచెన్నై 2’ గురించి మాట్లాడుతూ.. దానికి చాలా సమయం పడుతుందన్నారు.    ‘వాడి వాసల్‌’ తర్వాత తాను ఏ ప్రాజెక్ట్‌ చేసేది తెలియదన్నారు.

జల్లికట్టు ఇతివృత్తంగా ‘వాడి వాసల్‌’ తెరకెక్కనుంది. సూర్య, వెట్రిమారన్‌ తొలిసారి ఈ ప్రాజెక్ట్‌ కోసం కలిసి పని చేస్తున్నారు. 2021లోనే ఈ ప్రాజెక్ట్‌ అనౌన్స్‌ చేసినప్పటికీ కరోనా కారణంగా షూటింగ్‌ ఆలస్యంగా ప్రారంభమైంది. 2022లో షూట్‌ మొదలుకాగా.. సూర్యపై పలు కీలక సన్నివేశాలు చిత్రీకరించారు. సినిమాలో చూపించే ఎద్దు సన్నివేశాల కోసం లండన్‌లో సీజీ పనులు జరుగుతున్నాయని గతంలో వెట్రిమారన్‌ తెలిపారు.