శ్వాసలో.. హద్దుల్ని దాటాలన్న ఆశ

వైష్ణవ్‌ తేజ్‌, రకుల్‌ ప్రీత్‌ సింగ్‌ జంటగా దర్శకుడు క్రిష్‌ తెరకెక్కించిన చిత్రం ‘కొండపొలం’. సాయిబాబు జాగర్లమూడి, రాజీవ్‌ రెడ్డి నిర్మించారు. ఎమ్‌.ఎమ్‌.కీరవాణి స్వరాలందించారు. అక్టోబరు 8న ప్రేక్షకుల ముందుకొస్తోంది. ఈ నేపథ్యంలోనే గురువారం ఈ సినిమాలోని రెండో పాటని విడుదల చేశారు. ‘‘శ్వాసలో.. హద్దుల్ని దాటాలన్న ఆశ. ఆశలో.. పొద్దుల్ని మరిచే హాయి మోశా’’ అంటూ వినసొంపుగా సాగుతున్న ఈ ప్రేమ గీతానికి కీరవాణి స్వరాలు సమకూర్చడమే కాక స్వయంగా సాహిత్యం అందించారు. యామిని ఘంటసాల, పీవీఎస్‌ఎన్‌ రోహిత్‌ ఆలపించారు. పాటలో వైష్ణవ్‌, రకుల్‌ మధ్య కెమిస్ట్రీని ఆసక్తికరంగా చూపించారు. ‘‘సన్నపురెడ్డి వెంకటరామిరెడ్డి రాసిన నవల ‘కొండపొలం’ నవల ఆధారంగా ఈ సినిమా రూపొందించారు. అటవీ నేపథ్యంలో సాగే కథతో.. ఆద్యంతం ఉత్కంఠభరితంగా ఉంటుంది’’ అని చిత్ర బృందం తెలియజేసింది.