The Delhi Files: పెద్ద స్టార్స్‌ ఎవరూ ఉండరు.. ‘ది దిల్లీ ఫైల్స్‌’ అప్‌డేట్‌ ఇచ్చిన దర్శకుడు

ఇంటర్నెట్ డెస్క్‌: ‘ది కశ్మీర్‌ ఫైల్స్‌’తో సంచలనం సృష్టించారు బాలీవుడ్‌ దర్శకుడు వివేక్‌ అగ్నిహోత్రి. ఇటీవల ఆయన మరో సంచలనానికి తెరదీస్తూ ‘ది దిల్లీ ఫైల్స్‌’ను ప్రకటించిన సంగతి తెలిసిందే. తాజాగా దీనిపై ఆయన అప్‌డేట్‌ ఇచ్చారు. షెడ్యూల్‌ ప్రకారం ‘ది దిల్లీ ఫైల్స్‌’ ఈ ఏడాదిలో ప్రారంభించనున్నట్లు చెప్పారు. కచ్చితంగా వచ్చే సంవత్సరంలో ఇది ప్రేక్షకుల ముందుకుతీసుకురానున్నట్లు తెలిపారు. ఇందులో పెద్ద స్టార్స్‌ ఎవరూ ఉండరని, కంటెంట్‌ మాత్రం చాలా పెద్దదన్నారు.

ఈ చిత్రం గురించి వివేక్‌ మాట్లాడుతూ.. ‘కొన్ని సంవత్సరాల నుంచి నేను ఎవరూ చెప్పలేని కథలను ప్రపంచం కళ్లకు కట్టినట్లు చూపించడం ప్రారంభించాను. వాటిలో మొదటిది ‘ది తాష్కంట్‌ ఫైల్స్‌’.. ఇది విమర్శకుల ప్రశంసలు అందుకుంది. రెండోది ‘ది కశ్మీర్‌ ఫైల్స్‌’ ఈ సినిమా ప్రభంజనం సృష్టించింది. ఈ వరుసలో మూడోది ‘ది దిల్లీ ఫైల్స్‌’ దీన్ని కూడా ఆదరిస్తారని ఆశిస్తున్నాను’ అని రాసుకొచ్చారు. ఈ చిత్రానికి కూడా అభిషేక్‌ అగర్వాలే నిర్మాతగా వ్యవహరిస్తున్నారు. ప్రస్తుతం వివేక్‌ ‘పర్వ’తో బిజీగా ఉన్నారు. దీని ప్రీ ప్రొడక్షన్‌ పనులు శరవేగంగా జరుగుతున్నాయి. మహాభారతం ఆధారంగా దీన్ని తెరకెక్కిస్తున్నారు. మూడు భాగాలుగా ఇది ప్రేక్షకుల ముందుకురానుంది. ఈ చిత్రాన్ని ఎంతో ప్రతిష్ఠాత్మకంగా రూపొందించనున్నట్లు ఆయన తెలిపారు.