Thu kya jan: నా కళ్లు పలికించే ప్రేమ

ప్రేమలో కొత్త లోకాన్ని వెతికే ప్రేమికులకు ‘తు క్యా జానే’ పాట అంకితం అంటోంది ‘అమర్‌ సింగ్‌ చమ్కీలా’ చిత్రబృందం. అమర్‌ సింగ్‌ చమ్కీలా జీవితం ఆధారంగా వస్తున్న ఈ చిత్రంలో దిల్జీత్‌ దోసాంజ్‌ టైటిల్‌ పాత్రలో కనిపించనున్నారు. పరిణీతి చోప్రా కథానాయికగా ఇంతియాజ్‌ అలీ తెరకెక్కించారు. ఈ నెల 12న సినిమా విడుదల కానున్న సందర్భంగా ప్రచార పర్వాన్ని పరుగులు పెట్టిస్తోంది చిత్రబృందం. ఈ నేపథ్యంలో ‘తు క్యా జానే’ అనే పాటను విడుదల చేసింది. ‘ప్రియతమా..నీపై నాకున్న ప్రేమ నువ్వు అర్థం చేసుకోలేవు. మాటల్లో తెలుపలేని ప్రేమని నా కళ్లు పలికిస్తున్నాయి’ అంటూ పరిణీతి ప్రేమ పాట పాడుతోంది. ఈ పాటను యషికా సిక్కా ఆలపించగా, ఇర్షాద్‌ కమిల్‌ సాహిత్యం అందించారు.ఏఆర్‌ రెహమాన్‌ బాణీలు సమకూర్చారు.