Ravi teja: రవితేజ సరసన ‘యానిమల్‌’ హీరోయిన్‌..!

ఇంటర్నెట్ డెస్క్‌: ‘యానిమల్‌’ సినిమాతో ఒక్కసారిగా ట్రెండింగ్‌లోకి వచ్చారు నటి త్రిప్తి డిమ్రి (Tripti Dimri). ఇందులో సెకండ్‌ హీరోయిన్‌గా త్రిప్తి తన నటనతో అందరినీ ఆకట్టుకున్నారు. ఈ సినిమా తర్వాత సోషల్ మీడియాలో ఎక్కడ చూసిన ఆమె పేరే కనిపిస్తోంది. దీంతో ఆమె చేయనున్న తర్వాత ప్రాజెక్ట్‌ల గురించి వార్తలు మొదలయ్యాయి. ప్రస్తుతం ఆమెకు సంబంధించిన ఓ వార్త సోషల్‌ మీడియాలో వైరల్‌ అవుతోంది. టాలీవుడ్‌ ప్రాజెక్ట్‌లో త్రిప్తికు అవకాశం వచ్చినట్లు టాక్ వినిపిస్తోంది.

రవితేజ (Ravi teja) హీరోగా అనిల్ రావిపూడి దర్శకత్వంలో ఓ సినిమా తెరకెక్కనుందని కొన్ని రోజులుగా వార్తలు వస్తున్న విషయం తెలిసిందే. త్వరలోనే దీనికి సంబంధించి అధికారిక ప్రకటన రానుంది. ఈ సినిమాలో త్రిప్తి డిమ్రిని ఎంపిక చేసినట్లు సమాచారం. ఈ సినిమాతోనే ఆమె టాలీవుడ్‌కు ఎంట్రీ ఇవ్వనుందని టాక్ వినిపిస్తోంది. ప్రస్తుతం రవితేజ ‘ఈగల్‌’ సినిమాలో నటిస్తున్నారు. కార్తీక్‌ ఘట్టమనేని దర్శకత్వంలో తెరకెక్కుతోన్న ఈ చిత్రంలో కావ్య థాపర్‌, అనుపమ పరమేశ్వరన్‌ కథానాయికలు. తాజాగా చిత్రీకరణ పూర్తి చేసుకున్న ఈ సినిమా సంక్రాంతి కానుకగా జనవరి 13 విడుదల కానుంది. వినూత్నమైన యాక్షన్‌ థ్రిల్లర్‌ కథతో రూపొందింది. ఇందులో రవితేజ మునుపెన్నడూ చేయని శక్తిమంతమైన పాత్రలో కనిపించనున్నారు. ఇక దీని తర్వాత గోపిచంద్‌ మలినేని-రవితేజ కాంబోలో ఓ సినిమా రానుంది. దీనితో పాటే అనిల్‌ రావిపూడి చిత్రం కూడా పట్టాలెక్కనున్నట్లు సమాచారం.