vishwambhara: 18ఏళ్ల తర్వాత జంటగా..

‘స్టాలిన్‌’లో జంటగా కనిపించి ప్రేక్షకుల్ని మురిపించారు చిరంజీవి - త్రిష. ఈ విజయవంతమైన జోడీ 18 ఏళ్ల తర్వాత ‘విశ్వంభర’తో తిరిగి తెరపై కనువిందు చేసేందుకు సిద్ధమవుతోంది. వశిష్ఠ దర్శకత్వంలో యూవీ క్రియేషన్స్‌ నిర్మిస్తున్న చిత్రమే ‘విశ్వంభర’. ప్రస్తుతం ఈ సినిమా చిత్రీకరణ హైదరాబాద్‌లో శరవేగంగా జరుగుతున్న సంగతి తెలిసిందే. ఈ చిత్ర సెట్‌లోకి త్రిష సోమవారం అడుగు పెట్టింది. ఈ విషయాన్ని చిత్ర బృందం సామాజిక మాధ్యమాల వేదికగా ప్రకటించింది. సోషియో ఫాంటసీ అడ్వెంచర్‌ థ్రిల్లర్‌గా ముస్తాబవుతున్న ఈ చిత్రం కోసం ఓ కొత్త ప్రపంచాన్ని సృష్టిస్తోంది చిత్ర బృందం. ఇందుకోసం దాదాపు 13 భారీ సెట్‌లను సిద్ధం చేస్తున్నారు. దీంట్లో చిరు భీమవరం దొరబాబుగా వింటేజ్‌ లుక్‌తో కనిపించనున్నట్లు తెలుస్తోంది. ఈ సినిమాకి ఎం.ఎం.కీరవాణి సంగీతమందిస్తుండగా.. ఛోటా కె.నాయుడు ఛాయాగ్రాహకుడిగా వ్యవహరిస్తున్నారు. ఈ చిత్రం వచ్చే ఏడాది జనవరి 10న ప్రేక్షకుల ముందుకు రానుంది.