Vijay Deverakonda: విజయ్‌ దేవరకొండ- సుకుమార్‌ కాంబో.. అప్‌డేట్‌ ఇచ్చిన నిర్మాత

ఇంటర్నెట్‌ డెస్క్: హీరో విజయ్‌ దేవరకొండ (Vijay Deverakonda)- డైరెక్టర్‌ సుకుమార్‌ (Sukumar) కాంబినేషన్‌లో ఓ సినిమా ఖరారైన సంగతి తెలిసిందే. ప్రకటన వెలువడి ఏళ్లు గడుస్తున్నా చిత్రం ఇప్పటికీ పట్టాలెక్కలేదు. ‘గం గం గణేశా’ ట్రైలర్‌ విడుదల వేడుకలో ఆ సినిమా నిర్మాతల్లో ఒకరైన వంశీ కారుమంచి దానిపై స్పందించారు. విలేకరి అడిగిన ప్రశ్నకు సమాధానమిస్తూ.. ‘‘సుకుమార్‌, విజయ్‌ ఇద్దరూ బిజీగా ఉన్నారు. ‘పుష్ప 2’ తర్వాత సుకుమార్‌.. రామ్‌ చరణ్‌తో ఓ మూవీ చేయనున్నారు. అది పూర్తయిన తర్వాత విజయ్‌తో సినిమా తెరకెక్కిస్తారు. ఆ ప్రాజెక్టు తప్పక ఉంటుంది’’ అని తెలిపారు.

విజయ్‌ హీరోగా సుకుమార్‌ సినిమా తెరకెక్కించనున్నట్టు ఫాల్కన్‌ క్రియేషన్స్‌ సంస్థ 2020లోనే ప్రకటించింది. 2022లో ప్రేక్షకుల ముందుకు తీసుకొచ్చేందుకు సన్నాహాలు చేసింది. ఆ బ్యానర్‌లో అదే తొలి సినిమాగా అనౌన్స్‌ చేశారు. అది ఆలస్యమవుతుండడంతో.. ఇప్పుడా సంస్థ నుంచి ‘గం గం గణేశా’ (Gam Gam Ganesha) వస్తోంది. విజయ్‌ సోదరుడు ఆనంద్‌ (Anand Deverakonda) హీరోగా నూతన దర్శకుడు ఉదయ్‌ బొమ్మిశెట్టి రూపొందించిన చిత్రమిది. యాక్షన్‌ ఎంటర్‌టైనర్‌గా తెరకెక్కిన ఈ సినిమా ఈ నెల 31న రిలీజ్‌ కానుంది.

అల్లు అర్జున్‌ హీరోగా సుకుమార్‌ తెరకెక్కిస్తున్న ‘పుష్ప 2’ ఆగస్టు 15న విడుదల కానుంది. ప్రస్తుతం ‘గేమ్‌ ఛేంజర్‌’తో బిజీగా ఉన్న రామ్‌ చరణ్‌.. బుచ్చిబాబు దర్శకత్వంలో ఓ సినిమా ఖరారు చేశారు. ఇటీవల ‘ఫ్యామిలీ స్టార్‌’తో ప్రేక్షకుల ముందుకొచ్చిన విజయ్‌.. మూడు విభిన్న ప్రాజెక్టులు అనౌన్స్‌ చేశారు. దర్శకులు గౌతమ్‌ తిన్ననూరి, రాహుల్‌ సాంకృత్యాయన్‌, రవి కిరణ్‌ కోలా వాటిని తెరకెక్కిస్తున్నారు.