12Th Fail: ‘ట్వెల్త్‌ ఫెయిల్‌’ తెర వెనుక కథ

ఎన్నో అవమానాలను ఎదుర్కొంటూ పట్టుదలతో చదివి ఐపీఎస్‌గా తన లక్ష్యాన్ని నెరవేర్చుకున్న మనోజ్‌ శర్మ జీవితం ఆధారంగా రూపొందిన చిత్రం ‘ట్వెల్త్‌ ఫెయిల్‌’. విధు వినోద్‌ చోప్రా తెరకెక్కించారు. విక్రాంత్‌ మాస్సే ఇందులో తన నటనతో సినీప్రియుల మనసుల్ని గెలుచుకున్నాడు. ఈ సినిమా తెర వెనుక ప్రయాణాన్ని చూపించడానికి ‘జీరో సే రీస్టార్ట్‌’ అనే పేరుతో ఓ ప్రాజెక్టును తీసుకురాబోతున్నట్లు తెలిపారు దర్శకుడు. తాజాగా ఈ ప్రాజెక్టును ప్రకటిస్తూ..ఇన్‌స్టాలో పోస్టర్‌ను పంచుకున్నారాయన. ‘‘ఎన్నో అవమానాలు..మరెన్నో విమర్శల మధ్య నిజాయతీగా గెలిచిన విజయవంతమైన కథ ‘ట్వెల్త్‌ ఫెయిల్‌’. ఈ సినిమా ప్రారంభమైన మొదటి రోజు నుంచి దీన్ని థియేటర్లలో విడుదల చేయకుండా ఎదురైన అడ్డంకుల వరకూ ఓ క్రేజీ కథ రూపంలో తీసుకొస్తున్నాము. జులై 19న ఇది విడుదల కానుంది’’ అని వ్యాఖ్యల్ని జోడించారు.