Vishal: ఉదయనిధి బ్యానర్‌తో పెద్ద గొడవ.. రాబోయే చిత్రానికీ పేచీ పెట్టొచ్చు: విశాల్‌

చెన్నై: ఉదయనిధి స్టాలిన్‌కు చెందిన రెడ్‌ జెయింట్‌ సంస్థతో నెలకొన్న వివాదంపై తాజాగా ఇచ్చిన ఇంటర్వ్యూలో నటుడు విశాల్‌ (Vishal) స్పందించారు. ఆ సంస్థకు చెందిన ఒక వ్యక్తితో పెద్ద గొడవ జరిగిందన్నారు. ‘‘నేను నటించిన ‘ఎనిమి’ (2021) రిలీజ్‌ సమయంలో ఓ సంఘటన చోటుచేసుకుంది. అది ఉదయనిధి స్టాలిన్‌ దృష్టికి వెళ్లిందో లేదో నాకు తెలియదు. రెడ్‌ జెయింట్‌లో ఉన్న ఒక వ్యక్తితో పెద్ద గొడవ జరిగింది. ఒకరు కష్టపడి తెరకెక్కించిన చిత్రాన్ని వాయిదా వేసుకోమని అడిగే హక్కు మరొకరికి లేదు. ఎందుకంటే, సినిమా ఏ ఒక్కరి సొత్తు కాదు. ‘తమిళ సినిమా నా చేతుల్లోనే ఉంది’ అని చెప్పిన చాలామంది కనుమరుగయ్యారు. నా నిర్మాత కోసం నేను ముందు నిలబడ్డా. ‘ఒక చిత్రాన్ని తీర్చిదిద్దడానికి రక్తాన్ని ధారపోస్తుంటే.. ఏసీ రూమ్‌లో కూర్చొనే మీరు దాన్ని వాయిదా వేయమని కోరడం న్యాయం కాదు. అసలు అలా అడిగే హక్కు మీకు ఎవరు ఇచ్చారు? ఇండస్ట్రీని ఏమైనా లీజుకు తీసుకున్నారా?’ అని ప్రశ్నించా’’

‘‘మార్క్‌ ఆంటోనీ’ టైమ్‌లోనూ ఇదే రిపీట్‌ అయ్యింది. జీర్ణించుకోలేకపోయా. అతడికి ఫోన్‌ చేసి.. ‘వాయిదా వేయమనడానికి నువ్వెవరు? సినిమా ఫలితాన్ని ప్రేక్షకులు నిర్ణయిస్తారు’ అని చెప్పా. అనుకున్న తేదీకి విడుదల చేశా. నా నిర్మాతకు లాభాలు వచ్చాయి. దర్శకుడు అధిక్‌కు మంచి జీవితం లభించింది. నా ఖాతాలో హిట్‌ పడింది. నేను చేసిన తదుపరి చిత్రం ‘రత్నం’కు కూడా అతడు ఇబ్బందులు సృష్టించవచ్చు. ఎలాంటి సమస్యలు వచ్చినా ఎదుర్కొంటా. ఇలా చెప్పడానికి ఎవరికీ ధైర్యం ఉండదు. నిర్మాతలందరూ ఏకతాటి పైకి  వస్తే చిత్రపరిశ్రమ మరో స్థాయిలో ఉంటుంది’’ అని విశాల్‌ చెప్పారు.