TSPSC ఛైర్మన్‌గా మహేందర్‌రెడ్డిని తొలగించండి: ఎమ్మెల్సీ కవిత

హైదరాబాద్‌: రాష్ట్రగీతం గురించి సీఎం రేవంత్‌రెడ్డి మాట్లాడటం హాస్యాస్పదంగా ఉందని భారాస ఎమ్మెల్సీ కల్వకుంట్ల కవిత వ్యాఖ్యానించారు. బంజారాహిల్స్‌లో నిర్వహించిన మీడియా సమావేశంలో ఆమె మాట్లాడారు. రేవంత్‌ ఎన్నడూ ‘జై తెలంగాణ’ అని కూడా అనలేదన్నారు. ‘‘తెలంగాణ తల్లి విగ్రహం నాలా ఉందని సీఎం అంటున్నారు. నేనూ తెలంగాణ ఆడబిడ్డనే కదా?’’ అని ప్రశ్నించారు. మహేందర్‌రెడ్డిపై అవినీతి ఆరోపణలు వస్తున్నాయని.. టీఎస్‌పీఎస్సీ ఛైర్మన్‌గా ఆయనను తొలగించి, న్యాయ విచారణకు ఆదేశించాలని డిమాండ్‌ చేశారు.

‘‘రాష్ట్రంలో కరెంట్ కోతలు మొదలయ్యాయి. హైదరాబాద్‌లో 3-4 గంటలపాటు విద్యుత్‌ కోతలు ఉంటున్నాయి. విద్యుత్‌ సంస్థల్లో ఏపీ వాళ్లను డైరెక్టర్‌లుగా నియమించారు. తెలంగాణ అసెంబ్లీకి ఏపీ అడ్వైజర్‌ ఎందుకు? గతంలో సలహాదారులే వద్దన్న రేవంత్‌ ఇప్పుడెలా నియమిస్తున్నారు? ఇదంతా రాజకీయ పునరావాసం కోసమే కదా?’’ అని కవిత ప్రశ్నించారు.