Kishan Reddy: రాహుల్‌ గాంధీ ఈ జన్మలో ప్రధాని కాలేరు: కిషన్‌రెడ్డి

హైదరాబాద్‌: వచ్చే ఎన్నికల్లో కేంద్ర ప్రభుత్వ పథకాలతో ప్రజల్లోకి వెళ్లాలని కేంద్ర మంత్రి కిషన్‌రెడ్డి భాజపా నేతలకు దిశానిర్దేశం చేశారు. ఇంటింటికీ వెళ్లి ప్రతి ఒక్కరినీ కలవాలని సూచించారు. హైదరాబాద్‌లోని పార్టీ కార్యాలయంలో కిషన్‌రెడ్డి అధ్యక్షతన భాజపా రాష్ట్ర పదాధికారుల సమావేశం జరిగింది. ఈ భేటీకి పార్టీ ముఖ్యనేతలు సునీల్‌ బన్సల్‌, తరుణ్‌ చుగ్‌, లక్ష్మణ్‌, డీకే అరుణ, బండి సంజయ్‌, ఈటల రాజేందర్‌ హాజరయ్యారు. పార్లమెంట్‌ ఎన్నికల ప్రచార వ్యూహంపై చర్చించారు.

ఈ సందర్భంగా కిషన్‌రెడ్డి మాట్లాడుతూ.. తెలంగాణలో భాజపాకు సానుకూల వాతావరణం ఉందన్నారు.‘‘ రాష్ట్రంలో భాజపాకు రెండంకెల సీట్లు వస్తాయి. పోలింగ్‌ బూత్‌ వారీగా కార్యాచరణ రూపొందించుకోవాలి. రాహుల్‌ ప్రధాని అయితేనే గ్యారంటీలు అమలు చేస్తామని సీఎం రేవంత్‌రెడ్డి అంటున్నారు. రాహుల్‌ ఈ జన్మలో ప్రధాని కాలేరు. గ్యారంటీలు అమలు చేయకుండా రేవంత్‌ మోసం చేస్తున్నారు’’ అని విమర్శించారు.