Revanth Reddy: నన్ను దెబ్బతీసేందుకు గూడుపుఠాణీ చేస్తున్నారు: రేవంత్‌

కొడంగల్‌: గడిచిన వంద రోజుల్లో కొడంగల్‌ నియోజకవర్గంలో పలు అభివృద్ధి పనులు చేపట్టినట్లు సీఎం రేవంత్‌రెడ్డి తెలిపారు. కొడంగల్‌ కాంగ్రెస్‌ సమన్వయ కమిటీ నేతలు, ఏడు మండలాలకు చెందిన ముఖ్య నాయకులతో ఆయన సమీక్ష నిర్వహించారు. బూత్‌స్థాయి నేతలు సమన్వయంతో పని చేయాలని దిశానిర్దేశం చేశారు. భాజపా, భారాసకు ఓటు వేయొద్దని పిలుపునిచ్చారు. పాలమూరుకు జాతీయ హోదా ఇవ్వడంలో మోదీ విఫలమయ్యారని, పేదలకు పక్కా ఇళ్లు ఇవ్వకుండా గులాబీ పార్టీ వంచించిందని విమర్శించారు. 

‘‘కొడంగల్‌లో కాంగ్రెస్‌ను ఓడించి.. నన్ను కిందపడేయాలని భాజపా, భారాస కుట్రలు చేస్తున్నాయి. పదేళ్లుగా ప్రధాని మోదీ ఈ ప్రాంతానికి ఏం చేశారు? నన్ను దెబ్బతీయడానికి గూడుపుఠాణీ చేస్తున్నారు. నేను ఎక్కడున్నా.. నా గుండె చప్పుడు కొడంగల్‌ మాత్రమే. ఈ నియోజకవర్గాన్ని దేశంలోనే ఆదర్శవంతంగా తీర్చిదిద్దుతాం. ప్రతిపక్షాల కుట్రలు, కుతంత్రాలను తిప్పికొట్టాలి’’ అని రేవంత్‌ పిలుపునిచ్చారు.