Archana Patil: కాంగ్రెస్‌ నుంచి మరొకరు ఔట్‌.. భాజపా గూటికి అర్చన పాటిల్‌

ముంబయి: లోక్‌సభ మాజీ స్పీకర్, కాంగ్రెస్ నేత, శివరాజ్ పాటిల్ కోడలు అర్చన పాటిల్ శనివారం భాజపాలో చేరారు. అర్చన పాటిల్ ఉద్గీర్‌లోని లైఫ్‌కేర్ హాస్పిటల్ అండ్ రీసెర్చ్ సెంటర్ చైర్‌పర్సన్‌గా విధులు నిర్వర్తిస్తుండగా ఆమె భర్త శైలేష్ పాటిల్ కాంగ్రెస్ పార్టీ రాష్ట్ర కార్యదర్శిగా కొనసాగుతున్నారు.

‘‘రాజకీయాల్లో సేవలందించడానికే నేను భాజపాలో చేరాను. ప్రధాని మోదీ తీసుకువచ్చిన నారీ శక్తి వందన్ అధినియం నన్ను బాగా ప్రభావితం చేసింది. ఇది మహిళలకు అన్నిరంగాల్లో సమాన అవకాశాన్ని కల్పిస్తుంది. నేను లాతూర్‌లో అట్టడుగు స్థాయిలో పనిచేశాను. భాజపాలో కూడా అదేవిధంగా పని చేస్తాను. నేను అధికారికంగా కాంగ్రెస్‌లో లేను. భాజపా భావజాలం నన్ను ఆకర్షించింది కాబట్టి ఇందులో చేరాను’’ అని అర్చన పాటిల్ విలేకరుల సమావేశంలో తెలియజేశారు.

మహారాష్ట్ర ఉప ముఖ్యమంత్రి దేవేంద్ర ఫడ్నవీస్‌ను అర్చన ఆయన అధికారిక నివాసం 'సాగర్'లో శుక్రవారం కలిసి చర్చలు జరిపారు. అనంతరం శనివారం ఫడ్నవీస్‌, ఇతర భాజపా నేతల ఆధ్వర్యంలో కాషాయ కండువా కప్పుకున్నారు.