CPI: జగన్‌.. ఇకనైనా కక్షసాధింపు రాజకీయాలు మానుకోవాలి: రామకృష్ణ

అమరావతి: సీపీఐ రాష్ట్ర కార్యదర్శి రామకృష్ణ నేతృత్వంలో బస్సు యాత్ర కొనసాగుతోంది. యాత్రలో భాగంగా ఇవాళ తుళ్లూరుకు చేరుకున్న సీపీఐ నేతలకు రాజధాని రైతులు ఘనస్వాగతం పలికారు. తుళ్లూరులోని దీక్షా శిబిరం నుంచి రైతులతో రామకృష్ణ ర్యాలీ నిర్వహించారు. అనంతరం వారితో మాట్లాడారు.

‘‘అమరావతి రాజధానిగా ఉండాలని గతంలో అందరూ అంగీకరించారు. మాట మార్చిన వ్యక్తిగా జగన్‌ చరిత్రలో నిలిచిపోతారు. కులం పేరుతో దుష్ప్రచారాలు చేస్తారా? సీఎం హోదాలో ఉన్న వ్యక్తి ఒక కులానికి వ్యతిరేకంగా మాట్లాడతారా? జగన్‌ కంటే పెత్తందారు ఎవరైనా ఉన్నారా? ఇకనైనా కక్షసాధింపు రాజకీయాలు మానుకోవాలి. వైకాపా పాలనలో అన్ని రంగాలు నష్టపోయాయి’’ అని రామకృష్ణ విమర్శించారు.