Amaravati: వైకాపాని ఓడిద్దాం.. అమరావతిని నిర్మిద్దాం: దళితబహుజన ఫ్రంట్‌, కాపునాడు

అమరావతి: వైకాపాని ఓడిద్దాం.. అమరావతిని నిర్మిద్దామని దళిత బహుజన ఫ్రంట్‌, కాపునాడు నాయకులు పిలుపునిచ్చారు. ఆ మేరకు విజయవాడలోని కాపునాడు కార్యాలయంలో కరపత్రం ఆవిష్కరించారు. సీఎం జగన్‌కు ఓటు అడిగే హక్కు లేదని దళిత బహుజన ఫ్రంట్‌ నాయకులు విమర్శించారు.

వైకాపా ప్రభుత్వం రాష్ట్రంలోని దళిత, బహుజనులకి తీరని ద్రోహం చేసిందని మండిపడ్డారు. గత ప్రభుత్వం దళితులు, బహుజనులకు ఇచ్చిన 27 పథకాలను జగన్‌ సర్కారు రద్దు చేసిందని ఆవేదన వ్యక్తం చేశారు. ఎస్సీ, ఎస్టీ సబ్‌ప్లాన్‌ నిధులు నవరత్నాలకు మళ్లించడం అన్యాయమన్నారు. విదేశీ విద్యకి అంబేడ్కర్‌ పేరు తొలగించి జగన్‌ పేరు పెట్టుకోవడం ఏంటని దళిత బహుజన, కాపునాడు నేతలు ప్రశ్నించారు. హత్యలు చేసిన వారికి సైతం జగన్‌.. ఎంపీ, ఎమ్మెల్యే టికెట్లు ఇచ్చారని దుయ్యబట్టారు.