Eatala Rajender: కేసీఆర్‌పై పోటీ చేస్తానని.. ఆషామాషీగా చెప్పలేదు: ఈటల

జమ్మికుంట: సీఎం కేసీఆర్‌పై గజ్వేల్‌ నుంచి పోటీ చేస్తానని ఆషామాషీగా చెప్పలేదని.. కచ్చితంగా చేసి తీరుతానని హుజూరాబాద్‌ ఎమ్మెల్యే, భాజపా నేత ఈటల రాజేందర్‌ వెల్లడించారు. జమ్మికుంటలో జరగనున్న కేంద్ర మంత్రి రాజ్‌నాథ్‌సింగ్‌ బహిరంగ సభ ఏర్పాట్లను ఆయన పరిశీలించారు. ఈ సందర్భంగా మీడియాతో మాట్లాడారు. దమ్ముంటే ఒకే నియోజకవర్గం నుంచి పోటీ చేయాలంటూ ఇటీవల మంత్రి గంగుల కమలాకర్‌ చేసిన సవాల్‌పై ఆయన స్పందించారు.

హుజూరాబాద్‌ ఉప ఎన్నికలో తనను ఓడించేందుకు రూ.100 కోట్లు ఖర్చు పెట్టారన్నారు. ఎంతో మంది మంత్రులు, ఎమ్మెల్యేలు వచ్చి దౌర్జన్యం చేసినా.. అధికార యంత్రాంగం మొత్తాన్ని తనపై కేంద్రీకరించినా గెలిచానని వివరించారు. ఆ ఉపఎన్నిక తర్వాత సీఎం కేసీఆర్‌ను ఓడించటమే తన లక్ష్యమని చెప్పారు. ఆ మేరకే గజ్వేల్‌ నుంచి పోటీ చేయనున్నట్టు ఈటల స్పష్టం చేశారు.