Eatala Rajender: మల్కాజిగిరి నుంచి పోటీ చేసే ఆలోచనలో ఉన్నా: ఈటల

యాదగిరిగుట్ట: వచ్చే లోక్‌సభ ఎన్నికల్లో భాజపా గెలుపు ఖాయమని మాజీ మంత్రి ఈటల రాజేందర్‌ ధీమా వ్యక్తం చేశారు. యాదాద్రి భువనగిరి జిల్లా యాదగిరిగుట్టలో నిర్వహించిన భాజపా విజయ సంకల్ప యాత్రలో ఆయన మాట్లాడారు. పార్లమెంట్ ఎన్నికల్లో కాంగ్రెస్, భారాసకు ఓటు వేస్తే ఎలాంటి ప్రయోజనం ఉండదన్నారు. మోదీ సర్కారుతోనే దేశ అభివృద్ధి సాధ్యమని చెప్పారు. మోదీ ప్రధాని అయ్యాక దేశంలో సమూలమార్పులు తీసుకువచ్చారని వివరించారు.

తెలంగాణలో ప్రజలు మార్పు కోరుకొని కాంగ్రెస్ పార్టీకి అధికారం కట్టబెడితే.. ఓడిపోయిన అభ్యర్థులతో అభివృద్ధి పనులు ప్రారంభిస్తున్నారన్నారు. కాంగ్రెస్ అహంకారానికి ఇది నిదర్శనమని మండిపడ్డారు. అప్పుల కోసం సీఎం రేవంత్‌రెడ్డి కేంద్రం చుట్టూ తిరుగుతున్నారని ఎద్దేవా చేశారు. ‘‘సార్వత్రిక ఎన్నికల్లో అవకాశం వస్తే పోటీకి సిద్ధమే. మల్కాజిగిరి స్థానం నుంచి పోటీ చేసే ఆలోచనలో ఉన్నా. అధిష్ఠానం ఆదేశిస్తే పోటీ చేస్తా’’ అని ఈటల వెల్లడించారు.