Eatala Rajender: ఈసారి గజ్వేల్‌లోనూ అదే జరుగుతుంది: ఈటల రాజేందర్‌

గజ్వేల్‌ గ్రామీణం: గజ్వేల్‌లో ఎన్నికలు కురుక్షేత్ర యుద్ధం లాంటివని హుజూరాబాద్‌ ఎమ్మెల్యే ఈటల రాజేందర్‌ అన్నారు. ఈ ఎన్నికల్లో ప్రజలు భారాసకు బుద్ధి చెబుతారన్నారు. ఎన్ని కుయుక్తులు పన్నినా గజ్వేల్‌లో గెలిచేది భాజపానే అని ధీమా వ్యక్తం చేశారు. వర్గల్‌ సరస్వతీ దేవి ఆలయంలో ప్రత్యేక పూజల అనంతరం పార్టీ కార్యకర్తలతో ఈటల రాజేందర్ సమావేశమయ్యారు. ఈ సందర్భంగా భారాసపై విమర్శలు గుప్పించారు.

ఈటల మాట్లాడుతూ.. ‘‘గజ్వేల్‌లో ఏ పార్టీ అయినా సరే మీటింగ్ పెట్టుకోవచ్చు. అయితే, భాజపా నిర్వహించే సమావేశాలకు రాకుండా ప్రజలను అడ్డుకుంటున్నారు. దావతులు ఇచ్చి, పైసలు పంచి రాకుండా ఆపేస్తున్నారు. హుజూరాబాద్‌ ఉప ఎన్నిక సమయంలోనూ ఇదే తరహాలో చేశారు. కానీ అక్కడ ఈ ప్రలోభాలు, డబ్బు పంపకాలకు హుజూరాబాద్‌ ప్రజలు పాతరేసి ధర్మాన్ని, న్యాయాన్ని, ఉద్యమ బిడ్డను గెలిపించుకున్నారు. ఈసారి గజ్వేల్‌లో కూడా అదే జరుగుతుంది. ప్రజాస్వామ్యాన్ని, ధర్మాన్ని కాపాడాలని గజ్వేల్‌ ప్రజలను కోరుతున్నా’’ అని అన్నారు.