కొలీజియంలో కేంద్ర ప్రతినిధి నియామకం సరికాదు

తమిళనాడు సీఎం స్టాలిన్‌

చెన్నై, న్యూస్‌టుడే: న్యాయమూర్తుల ఎంపిక బృందమైన కొలీజియంలో కేంద్ర ప్రభుత్వ ప్రతినిధిని నియమించడం సరికాదని తమిళనాడు ముఖ్యమంత్రి స్టాలిన్‌ ఓ ఇంటర్వ్యూలో అభిప్రాయపడ్డారు. ఇది న్యాయశాఖ స్వేచ్ఛకు అడ్డుపడేలా ఉందన్నారు. ఇది హైకోర్టు, సుప్రీంకోర్టుల్లో సామాజిక న్యాయం ప్రాతిపదికన న్యాయమూర్తుల ఎంపిక విధానానికి రవ్వంతైనా సహకరించదని తెలిపారు. ప్రాంతీయ భాషల్లో సుప్రీంకోర్టు తీర్పులు వెలువడటంపై హర్షం వ్యక్తం చేశారు. మద్రాసు హైకోర్టులో వాదనలు తమిళంలో సాగాలని, సుప్రీంకోర్టు ధర్మాసనం రాష్ట్రంలో ఏర్పాటు కావాలన్న తమ డిమాండ్లకు ఇది తొలి మెట్టుగా భావిస్తున్నట్టు తెలిపారు. రాష్ట్రంలో పాన్‌ మసాల, గుట్కా తదితర మత్తుపదార్థాల నిషేధ ఉత్తర్వులను హైకోర్టు తొలగించడాన్ని సవాల్‌ చేస్తూ సుప్రీంకోర్టులో తమ ప్రభుత్వం అప్పీల్‌ చేయనుందని పేర్కొన్నారు. శ్రీలంకలోని తమిళులు ఆశించేలా అధికార పంపిణీ జరగాలన్నది తమ వైఖరిగా వెల్లడించారు. జరగనున్న పార్లమెంట్‌ సమావేశాల్లో డీఎంకే ఎంపీలు ఈ అంశాన్ని లేవనెత్తుతారని తెలిపారు.