తిరుమలలో గంజాయి దొరకడం షాక్‌కు గురిచేసింది

తెదేపా అధినేత చంద్రబాబు

ఈనాడు డిజిటల్‌, అమరావతి : ప్రముఖ పుణ్యక్షేత్రం తిరుమలలో గంజాయి దొరికిన ఘటనపై తెదేపా అధినేత చంద్రబాబు ఆందోళన వ్యక్తం చేశారు. ‘‘తిరుమలలో గంజాయి వార్త షాక్‌కు గురిచేసింది. రాష్ట్రంలో గంజాయి భూతం రోజురోజుకూ విస్తరిస్తోందనడానికి ఇదో సాక్ష్యం. పరమ పవిత్ర పుణ్యక్షేత్రంలో ఇలాంటి పరిస్థితి అత్యంత ఆవేదన కలిగిస్తోంది. భక్తుల మనోభావాల విషయంలో ప్రభుత్వం బాధ్యతగా స్పందించాలి’’ అని చంద్రబాబు శనివారం ట్వీట్‌ చేశారు. తిరుమల కొండపైకి అక్రమంగా గంజాయి తరలిస్తున్న పొరుగుసేవల ఉద్యోగికి సంబంధించిన వీడియోను ట్వీట్‌కు జత చేశారు.