అయిదు రాష్ట్రాల్లో.. 18% అభ్యర్థులపై క్రిమినల్‌ కేసులు

29% మంది కోటీశ్వరులు
ఏడీఆర్‌ నివేదికలో వెల్లడి

దిల్లీ: తెలంగాణ సహా అయిదు రాష్ట్రాల అసెంబ్లీ ఎన్నికల బరిలో నిలిచిన అభ్యర్థుల్లో 18% మందిపై క్రిమినల్‌ కేసులు ఉన్నాయి. మొత్తం అభ్యర్థుల్లో కోటీశ్వరుల వాటా 29%. అసోసియేషన్‌ ఫర్‌ డెమోక్రటిక్‌ రిఫార్మ్స్‌ (ఏడీఆర్‌) మంగళవారం విడుదల చేసిన నివేదికలో ఈ వివరాలను వెల్లడించింది. తెలంగాణ, మధ్యప్రదేశ్‌, రాజస్థాన్‌, ఛత్తీస్‌గఢ్‌, మిజోరం ఎన్నికల్లో కలిపి మొత్తంగా 8,054 మంది అభ్యర్థులు తమ అదృష్టాన్ని పరీక్షించుకుంటున్నారు. వారిలో 8,051 మంది ప్రమాణపత్రాలను ఏడీఆర్‌ పరిశీలించింది. అందులో గుర్తించిన వివరాల ప్రకారం- పోటీ చేస్తున్నవారిలో జాతీయ పార్టీల అభ్యర్థులు 2,117 మంది ఉన్నారు. రాష్ట్ర పార్టీల అభ్యర్థులు 537 మంది. రిజిస్టరైన గుర్తింపుపొందని పార్టీలవారు 2,051 మంది. 3,346 మంది స్వతంత్రులుగా బరిలో ఉన్నారు.

• క్రిమినల్‌ కేసులున్న అభ్యర్థులు - 1,452
• తీవ్ర నేరాల సంబంధిత కేసులున్నవారు - 959
• హత్య కేసులు నమోదైనవారు - 22
• హత్యాయత్నం కేసులున్నవారు - 82
• మహిళలపై నేరాలకు సంబంధించిన కేసులు నమోదైనవారు - 107
• మొత్తం అభ్యర్థుల్లో కోటీశ్వరులు - 2,371 మంది
• వారి సగటు ఆస్తి - రూ.3.36 కోట్లు