మంత్రి బొత్స ఇలాకాలోని జాబితాలో మృతుల పేర్లు

తొలగించాలని ఆర్డీవోకు తెదేపా, జనసేన విజ్ఞప్తి

చీపురుపల్లి, న్యూస్‌టుడే: మంత్రి బొత్స సత్యనారాయణ ప్రాతినిధ్యం వహిస్తున్న చీపురుపల్లి నియోజకవర్గంలోని పలు పోలింగ్‌ కేంద్రాల పరిధిలో మృతి చెందిన వారి పేర్లు ఓటర్ల జాబితాలో ఉన్నాయని తెదేపా, జనసేన నాయకులు ఆరోపించారు. వాటిని తొలగించాలని కోరుతూ ఆర్డీవో బి.శాంతికి మంగళవారం వారు వినతిపత్రం అందజేశారు. మృతుల పేర్లను జాబితాల నుంచి తొలగించాలని బీఎల్వోలకు విన్నవించినా వినడం లేదని గరివిడి, మెరకముడిదాం మాజీ ఎంపీపీలు పైల బలరాం, తాడ్డి సన్యాసినాయుడు, గరివిడి మండల అధ్యక్షుడు సారేపాక సురేష్‌కుమార్‌, జనసేన చీపురుపల్లి మండల అధ్యక్షుడు విసినిగిరి శ్రీనివాసరావు తదితరులు అన్నారు. మెరకముడిదాం మండలంలో బూత్‌ నంబరు 8లో 33 ఓట్లు, 9-57, 43-20, 38-19, గరివిడి మండలంలోని 103లో 37 ఓట్లు, 104-34, 106-25, 107-27, 108-37, 110-26, 114-31, 115లో 44 ఓట్లు ఉన్నాయన్నారు. చీపురుపల్లిలో 150వ నంబరు కేంద్రంలో 72 ఓట్లు, 141-32, 142-36, 149-52, 151-39, 152లో 22 ఓట్లు ఉన్నాయన్నారు. వాటిని పరిశీలించి తొలగించాలని ఆర్డీవోను కోరారు.