మాజీ ఎమ్మెల్సీ బీటెక్‌ రవికి బెయిల్‌

ఈనాడు, కడప: వైయస్‌ఆర్‌ జిల్లా పులివెందుల తెదేపా నియోజకవర్గ ఇన్‌ఛార్జి, మాజీ ఎమ్మెల్సీ బీటెక్‌ రవి కడప కేంద్ర కారాగారం నుంచి బుధవారం విడుదలయ్యారు. 10 నెలల కిందట పట్టణ విమానాశ్రయం వద్ద పోలీసులపై దౌర్జన్యానికి పాల్పడ్డారన్న అభియోగంపై ఈ నెల 14న పోలీసులు ఆయనను అరెస్టు చేశారు. అనంతరం కోర్టు రిమాండు విధించడంతో కడప కేంద్ర కారాగారానికి తరలించారు. తాజాగా రూ.25 వేల పూచీకత్తుపై జిల్లా కోర్టు బెయిల్‌ మంజూరు చేసింది. రెండు నెలల పాటు ప్రతి ఆదివారం వల్లూరు పోలీస్‌స్టేషన్‌లో హాజరు కావాలని మేజిస్ట్రేట్‌ ఆదేశించారు. కోర్టు అనుమతి లేకుండా దేశం విడిచి వెళ్లరాదని ఉత్తర్వుల్లో పేర్కొన్నారు. పులివెందుల నుంచి భారీ ఎత్తున తరలి వచ్చిన పార్టీ నాయకులు, కార్యకర్తలతో కలిసి బీటెక్‌ రవి పులివెందులకు పయనమయ్యారు. అన్ని విషయాలూ గురువారం వెల్లడిస్తానని ఆయన తెలిపారు.