రాజీనామా చేసిన వాలంటీర్లు తెదేపాలో చేరిక

గిద్దలూరు పట్టణం, న్యూస్‌టుడే: ప్రకాశం జిల్లా గిద్దలూరులోని సంజీవరాయునిపేట పరిధిలో పనిచేస్తూ రాజీనామా చేసిన వాలంటీర్లు వి.ఉదయకిరణ్‌, కె.రాధిక, ఎస్‌.లీలావతి, ఎం.వెంకటేశ్వర్లు, కె.సుమతి బుధవారం తెదేపాలో చేరారు. మాజీ ఎమ్మెల్యే, తెదేపా నియోజకవర్గ ఇన్‌ఛార్జి ముత్తుముల అశోక్‌రెడ్డి వీరిని పార్టీలోకి ఆహ్వానించారు. ఈ సందర్భంగా ఆ అయిదుగురూ మాట్లాడుతూ.. వైకాపా పాలనలో పార్టీ నాయకుల పెత్తనం ఎక్కువైందన్నారు. కార్యాలయానికి వచ్చిన వారికి కుర్చీలు వేయడం లేదన్న కారణంతో తమను ఇబ్బందులకు గురి చేశారని ఆరోపించారు. నిబంధనలకు విరుద్ధంగా పనిచేయాలని ఒత్తిడి చేశారని, ఆ వేధింపులు తట్టుకోలేక రాజీనామా చేసినట్లు తెలిపారు.