10 నుంచి చంద్రబాబు జిల్లా పర్యటనలు!

ఈనాడు, అమరావతి: తెదేపా అధినేత చంద్రబాబు త్వరలో పూర్తిస్థాయిలో పార్టీ కార్యకలాపాల్లో నిమగ్నం కానున్నారు. ఈ నెల 10 నుంచి జిల్లాల పర్యటనలకు వెళ్లేలా ప్రణాళికలు రూపొందిస్తున్నారు. రాష్ట్రంలోని నాలుగు ప్రాంతాల్లో పంచాయతీరాజ్‌ ఛాంబర్‌, సర్పంచుల సంఘం ఆధ్వర్యంలో నిర్వహించే సమావేశాల్లో పాల్గొంటారు. ఈ నెల 10న శ్రీకాకుళం, 11న కాకినాడ, 14న నరసరావుపేట, 15న కడపల్లో ఈ సమావేశాలు జరుగుతాయి. ఓటర్ల జాబితాలో వైకాపా నాయకులు చేస్తున్న అక్రమాలపై దిల్లీ వెళ్లి కేంద్ర ప్రధాన ఎన్నికల కమిషనర్‌కు ఫిర్యాదు చేయాలని చంద్రబాబు నిర్ణయించారు. ఇందుకోసం సమయం ఇవ్వాలని సీఈసీకి చంద్రబాబు లేఖ రాయనున్నట్టు సమాచారం.

దర్గా, మేరీమాత ఆలయాల సందర్శన

చంద్రబాబు శనివారం ఉదయం విజయవాడ కనకదుర్గమ్మ దర్శనం చేసుకోనున్నారు. ఆదివారం సింహాచలం అప్పన్నను, ఈ నెల 5న శ్రీశైలం మల్లన్నను దర్శించుకుంటారు. అనంతరం కడపలోని అమీన్‌పీర్‌ దర్గా, విజయవాడలోని గుణదల మేరీమాత ఆలయాల్ని సందర్శిస్తారు.